12.01.2025 | 15:50
Յուրաքանչյուր դատավոր պետք է գործի բացառապես օրենքի և իր խղճի թելադրանքով. ՀՀ նախագահ․ ՏԵՍԱՆՅՈՒԹ
Չնայած ՀՀ-ն Զեյնալիին մեղադրում էր հանցագործությունների մեջ, ՌԴ-ն մարդասիրություն դրսևորեց․ ադրբեջանցի բլոգերի փաստաբան
Քաղաքականություն
21.02.2024 | 17:32
Հայաստանի կողմից հետախուզվող ադրբեջանցի բլոգեր Քյամիլ Զեյլալիի փաստաբան Ալեքպեր Գարաևը, որը ՌԴ-ում ձերբակալվել, իսկ հետո ազատ է արձակվել, ադրբեջանական լրատվամիջոցներին մանրամասներ է հայտնել։
«Չնայած նրան, որ Հայաստանը Քյամիլի նկատմամբ հետախուզում է հայտարարել, և նրան ծանր հոդվածներով շատ լուրջ մեղադրանքներ են առաջադրվել, Ռուսաստանը մարդասիրություն դրսևորեց։ Ադրբեջանական պետության աջակցությամբ և համառությամբ Քյամիլ Զեյնալին այսօր կվերադառնա Ադրբեջան։ Ես շնորհակալ եմ բոլորին դրա համար: Մասնավորապես, իմ երախտագիտությունն եմ հայտնում Ռուսաստանում Ադրբեջանի դեսպանատանը և անձամբ դեսպան Փոլադ Բյուլբյուլօղլուին։ Նրանք իսկապես մեծ աշխատանք են կատարել»,- ասել է Գարաևը։
Ավելի վաղ ադրբեջանական լրատվամիջոցները հայտնել էին, որ Զեյնալիին մեղադրանք է առաջադրված ՀՀ Քրեական օրենսգրքի 4 հոդվածով՝ 135 (Մարդկության դեմ հանցագործություն), 137 (Պատերազմական հանցագործություններ), 140 (Պատերազմական հանցագործություններ՝ պատերազմի արգելված մեթոդներով), 147 (Վարձկանների հավաքագրում) և 149 (Ագրեսիա) հոդվածներով։
ՀՀ ներքին գործերի նախարարի մամուլի խոսնակը Factor.am-ի հետ զրույցում ասել էր՝ «Այդ անձի նկատմամբ սպանության մեղադրանքով կա հայտարարված միջպետական հետախուզում»՝ զերծ մնալով այլ մանրամասներ հաղորդելուց։ Ադրբեջանցի բլոգերի փաստաբանի տվյալներով՝ ՀՀ-ն Զեյնալիի նկատմամբ հետախուզում է հայտարարել 2020 թվականի սեպտեմբերի 29-ին։ Գարաևը հավելել էր, որ դեռ հայտնի չէ, թե կոնկրետ ինչ հանցավոր արարքի մասին է խոսքը։
«Քյամիլ Զեյնալին գիշերը ձերբակալվել է որպես կասկածյալ 48 ժամով։ Այսօր դատախազությունը սպասում է Հայաստանից որոշ նյութերի ստացմանը։ Իսկ եթե այս լրացուցիչ նյութերը ստացվեն, ապա վաղը Քյամիլ Զեյնալլին կկանգնի դատարանի առաջ՝ խափանման միջոցի ընտրության համար»,- ասել էր նա։
Ռուսական կողմը, փասատորեն, դատական նիստին չսպասելով՝ ազատ է արձակել Զեյնալիին։
Էմմա Չոբանյան
