Հուլիսի 1-ից ստենտավորման գները նվազել են․ մինչ այդ որքա՞ն շահույթ են ստացել ստենտ ներկրողներն ու ստենտավորում իրականացնող հիվանդանոցները․ ՏԵՍԱՆՅՈՒԹ

Առողջապահության նախարար Արսեն Թորոսյանը մոտ մեկ ամիս առաջ ազդարարեց, որ պետպատվերով ֆինանսավորվող՝ սրտամկանի ստենտավորման գները կնվազեն: Տեղեկացրեց, որ այդ նպատակով բանակցություններ են եղել նախարարության, ստենտ ներկրող ընկերությունների և ստենտավորում իրականացնող բուժհաստատությունների միջև:

Եռակողմ հուշագիր է ստորագրվել, արդյունքում հուլիսի 1-ից պետությունը դեղապատ ստենտով ստենտավորման համար կվճարի 750 հազար դրամ, իսկ ոչ դեղապատ ստենտով՝ 700 հազար դրամ:

Մինչ այդ կարիքավոր կամ պետպատվերով հիվանդներին 1 ստենտով ստենտավորելու համար պետպբյուջեից հիվանդանոցներին վճարվում էր 1 մլն 80 հազար դրամ: Երկու և ավելի ստենտների դեպքում գումարը ավելի բարձր էր:

Մի քանի տարի առաջ հիվանդանոցները 1 ստենտի տեղադրման համար հիվանդից պահանջում էին մինչև 1,6 մլն դրամ, դրանից առաջ՝ մինչև 2 մլն դրամ։

Իսկ սրտի ստենտավորումը կյանքի համար շատ կարևոր բժշկական միջամտություն է՝ նվազագույնը բարձրացնում է կյանքի որակը, կանխում հետագա բարդացումներն ու շատ հաճախ փրկում է մարդու կյանքը: Այդ պատճառով էլ երբեմն կոչվում է կյանքի ստենտավորում:

Առողջապահության փոխնախարար Արսեն Դավթյանը մեզ հետ զրույցում ասաց, որ պետության կողմից փոխհատուցվում է հանրապետությունում իրականացվող ստենտավորման կեսը՝ մոտ 3500 ստենտի տեղադրում, մոտ այդ քանակությամբ էլ իրականացվում է վճարովի հիմունքներով:

Փոխնախարարը նաև հիշում է, որ եթե 10 տարի առաջ 1 ստենտի արժեքը կազմում էր 400-500 հազար դրամ, այժմ՝ 100-200 հազար դրամ է:

Պետեկամուտների կոմիտեի տրամադրած տեղեկության համաձայն՝ 2017թ. ներմուծվել է 8786 ստենտ 107.1 հազար դրամ միջին մաքսային արժեքով, իսկ այս տարվա միայն հունվար-հուլիս ամիսներին 7064 ստենտ՝ մոտ 105 հազար դրամ արժեքով:

Այս գինն ապացուցում է, որ տարիներ շարունակ ստենտ ներկրողներն ու ստենտավորում իրականացնողները չափազանց բարձր շահույթ են ստացել առողջապահական այդ բիզնեսից՝ այն հիվանդի վրա վաճառելով 3-4 անգամ բարձր գնով։

Ա․Դավթյանը նույնպես ընդգծում է, որ ստենտավորման գործում թե ներկրողները, թե հիվանդանոցները մեծ շահույթ են ստացել: Հիմա 1 ստենտավորումից ստացած շահույթի չափը թեև դեռ բարձր է մնում, բայց գոնե նախկինի նման աստղաբաշխական չէ:

«Հերացի» թիվ մեկ համալսարանական հիվանդանոցի սրտաբանական բաժնի վարիչ Արամ Տերտերյանի ներկայացմամբ՝ մեր երկրում գործող գները ցածր են միջազգային գներից:

Բայց նա միանգամից հավելում է՝ քանի որ մեր երկիրը չունի ֆինանսական բարձր ապահովվածություն, սրտի ստենտավորման գները, այնուամենայնիվ, բարձր են: Մենք զրուցեցինք նաև այլ մասնագետի՝ գաստրոէնտերոլոգ-սոնոգրաֆիստ Հայկ Մանասյանի հետ, ով պարբերաբար իր մտահոգություններն է ներկայացնում Հայաստանում առողջապահության ոլորտում տեղի ունեցող բոլոր զարգացումների շուրջ։

Նա պնդում է, որ առանց շահույթի ստենտավորման գինը չպետք է գերազանցի 450 հազար դրամը, իսկ բնակչությանը հասանելի և առանց շահույթի ստենտավորում ապահովելու համար պետությունն այդ ծառայությունը պետք է վերցնի իր ձեռքը։

Մանրամասները տեսանյութում

Արմինե Ավետյան