«Հակակարկտային կայանները հովանավորներ ունեն Կառավարությունում, դրանց աշխատանքն ապահովելու համար հսկայական միջոցներ են ծախսվում»․ Հրաչ Բերբերյան

Օրերս տեղացած կարկուտն ու դրա հասցրած վնասները ևս մեկ անգամ ապացուցեցին, որ այն բարեփոխումները, որոնք կիրառում է ՀՀ գյուղատնտեսության նախարարությունն, արդյունավետ չեն, ինչ մասին բազմիցս ասվել է ոլորտի մասնագետների կողմից։

«Տեղացած կարկուտը անհամեմատ մեծ վնասներ է հասցրել գյուղացիներին, փաստորեն,  ևս մեկ անգամ ապացուցվեց, որ կարկուտի դեմ պայքարի այն տարբերակը՝ հակարարկտային կայանները, որոնք մերոնք կիրառում են,  արդյունավետ չեն, խնդրի լուծման համար համակարգային մոտեցում է պետք, նման վնասներից խուսափելու համար պետք է կիրառել հրթիռային համակարգեր, որոնք ամենաարդյունավետ են մեր պարագայում»,-Factor.am-ի հետ զրույցում ասաց «Հայաստանի ագրարագյուղացիական միավորում» ՀԿ-ի նախագահ Հրաչ Բերբերյանը՝ պնդելով, որ Կառավարությունը պետք է հեռացնի հակակարկտային կայանները։

«Կառավարությունը նպատակահարմար է գտնում անիմաստ փողեր ծախսել։ Արդեն 10 տարի է այդ սարքավորումները տեղադրված են։ Հակակարկտային կայանները հովանավորներ ունեն նաև Կառավարությունում, դրանց աշխատանքն ապահվովելու համար հսկայական միջոցներ են ծախսվում, սակայն, անարդյունք»,-նշեց նա։ 

Բերբերյանի համոզմամբ՝ գյուղացուն այսօր չեն կարող մխիթարել նախարարի և փոխվարչապետի՝ կարկտահարված շրջաններ այցերն ու դրանց մասին իրենց ֆեյսբուքյան էջերում գրառումները․ «Չինովնիկները կգան ու կգնան, իսկ գյուցացին կշարունկի մնալ իր խնդիրներով։ Հրատապ կարգով պետք է հաշվարկել կարկուտի հասցրած վնասները և արագ գործի դնել փոխհատուցումների մեխանիզմը։ Գյուղատնտեսությունը փրկելու համար լրջագույն բարեփոխումներ են մեզ պետք»,-խոսքը եզրափակեց Բերբերյանը։

Հիշեցնենք, որ երկու օր առաջ տեղացած կարկուտն ու փոթորիկը Արմավիրի մարզի Բամբակաշատ, Մրգաշատ, Ալաշկերտ և այլ համայնքներում մեծ վնասներ են հասցրել։ 

Աղավնի Սուքիասյան