Ալեն Սիմոնյանի եղբոր կինն արդեն տանն է. խափանման միջոցի փոփոխման համար սահմանված գրավի չափի մասին կողմերը չեն բարձրաձայնում

Ազգային ժողովի նախագահ Ալեն Սիմոնյանի եղբոր կնոջ նկատմամբ կիրառված խափանման միջոց կալանավորումը փոխվել է երկրից բացակայելու մասին արգելքով և գրավով, նա այս պահին արդեն տանն է։ Այս մասին FactorTV-ի հետ զրույցում նշեց Գևորգյանի պաշտպան Մուշեղ Ալեքսանյանը՝ չցանկանալով հայտնել սահմանված գրավի չափը.

«Դա հիմա կարևոր չէ, մեծ գումարի մասին չէ խոսքը»,- նշեց պաշտպանը։

Ալեն Սիմոնյանի եղբոր կնոջը, Լիլի Մկրյանին և կալանքի տակ գտնվող Աշոտ Հովհաննիսյանին անձնական երաշխավորությամբ ազատ արձակելու միջնորդություն էր ներկայացրել Ազգային ժողովի «Քաղաքացիական պայմանագիր» խմբակցության 64 պատգամավոր։ FactorTV-ի հարցին՝ արդյո՞ք խափանման միջոցի փոփոխման համար դեր են խաղացել նաև պատգամավորների կողմից տրված երաշխավորությունները, փաստաբանը պատասխանեց՝ չգիտի, դեռևս որոշումը չեն ստացել։

Նշենք, որ մոտ մեկ ժամ առաջ եղբոր կնոջ և երեխաների հետ լուսանկար էր հրապարակել ԱԺ նախագահը, ըստ ամենայնի ցույց տալով, որ Գևորգյանն ազատ է արձակվել։

Ավելի վաղ FactorTV-ն հայտնել էր, որ դատախազն այսօր սեփական նախաձեռնությամբ փոխել է Քննչական կոմիտեում քննվող քրեական վարույթով անցնող մեղադրյալներ՝ «Սիներջի» ընկերության աշխատակիցներ Անի Գևորգյանի և Լիլի Մկրյանի նկատմամբ կիրառված խափանման միջոց կալանքը:

«Հաշվի առնելով, որ վերոնշյալ մեղադրյալները ցուցմունքներ են տվել քրեական վարույթի համար էական նշանակություն ունեցող հանգամանքների վերաբերյալ, նրանց մասնակցությամբ կատարվել են առերեսումներ, որպիսի պայմաններում վարույթի տվյալ փուլում էականորեն նվազել է մեղադրյալներ Ա.Գ.-ի և Լ.Մ.-ի կողմից ոչ իրավաչափ վարքագիծ դրսևորելու, ապացուցման գործընթացին ապօրինի միջամտելու հավանականությունը՝ դատախազը վարույթն իրականացնող մարմնին հանձնարարել է մեղադրյալներ Ա.Գ.-ի և Լ.Մ.-ի նկատմամբ կիրառել համակցված այլընտրանքային խափանման միջոցներ՝ գրավ, բացակայելու արգելք և երաշխավորություն»,- հայտնել էին Դատախազությունից։

Հիշեցնենք, որ դատախազը 2024 թվականի հունվարի 31-ին հանրային քրեական հետապնդում էր հարուցել ՀՀ էկոնոմիկայի նախարարության պաշտոնատար անձանց նկատմամբ՝ Քրեական օրենսգրքի 441-րդ հոդվածի 2-րդ մասի 4-րդ կետով (պաշտոնատար անձի կողմից իշխանական կամ ծառայողական լիազորությունները կամ դրանցով պայմանավորված ազդեցությունը չարաշահելը կամ լիազորություններն անցնելը) արարք կատարելու, իսկ «Սիներջի» ընկերության ղեկավարի և աշխատակիցների նկատմամբ՝ նույն արարքին հանցակցելու հատկանիշներով (Քրեական օրենսգրքի 46-441-րդ հոդվածի 2-րդ մասի 4-րդ կետ): Ընկերության ղեկավար Աշոտ Հովհանիսյանի նկատմամբ որպես խափանման միջոց կիրառված կալանքը չի փոխվել։

Ազգային ժողովի նախագահ Ալեն Սիմոնյանի եղբոր կինը և մյուս անձինք մեղադրյալ են Էկոնոմիկայի նախարարությունում ենթադրյալ չարաշահումների դեպքի առթիվ նախաձեռված քրեական վարույթի շրջանակներում։

Ռոզա Վարդանյան