Սկանդալ՝ ԿԶՆԱԿ-ում. կրճատվող աշխատողները պնդում են՝ իրենք հաշվեհարդարի զոհ են․ ՏԵՍԱՆՅՈՒԹ

Կրթության զարգացման և նորարարության ազգային կենտրոնում սկանդալ է հասունացել: Լուծարվում է «Վերապատրաստման ծրագրերի մշակման և վերապատրաստումների արդյունավետության գնահատման» բաժինը: Բաժնի ղեկավար Արման Մալոյանն այն համոզմանն է, որ իրեն պատժում են «Հայոց պատմություն» առարկայի 7-րդ դասարանի դասագիրքը հետևողականորեն քննադատելու համար։ Նա այն մասնագետներից է, որոնք պնդում են՝ դասագիրքը պետք է հանվի շրջանառությունից, խոտանվի, լրամշակվի և հետո միայն վերադարձվի դպրոց:

Մարտի 27-ից ԿԳՄՍ նախարարության ենթակայության կառույցի մեկ տասնյակ աշխատակից դառնում է գործազուրկ․ Մալոյանի կարծիքով` իրենց այդպիսով փորձում են լռեցնել:

«Դրանք փոխկապակցված իրադարձություններ են, վրեժխնդրություն է, թե՝ ոչ, թող պատկան մարմինները որոշեն։ Այդ վերաբերմունքը շարունակվեց իմ կողմից նախարարության դիրքորոշումը չպաշտպանելու և դասագրքի վերաբերյալ դիտարկումներով հանդես գալուց հետո միայն»,- ասում է պատմական գիտությունների թեկնածու Մալոյանը։

ԿԶՆԱԿ-ի տնօրեն Արտաշես Թորոսյանը հերքում է բաժնի լուծարման և դասագրքի քննադատության միջև կապը: Ասում է՝ ևս 18 աշխատակից էլ կրճատվելու է կառույցի այլ բաժիններից: Տնօրենը պնդում է՝ ԿԶՆԱԿ-ի կառուցվածքը հոգաբարձուների խորհրդով փոխվում է բոլորովին այլ պատճառով։

Սկզբնական փուլում կառույցը հիմնականում զբաղված էր հանրակրթության պետական չափորոշչի լրամշակմամբ և փորձնական ծրագրի ներդրմամբ։ Ըստ Թորոսյանի՝ ԿԶՆԱԿ-ի կառուցվածքը համապատասխանեցված էր պետական չափորոշչի հիմնական ուղղություններին, այժմ արդեն չափորոշիչն ու ծրագրերը վերանայվել են, դասավանդման մեթոդիկայի, դպրոցների ուսումնական գործընթացի կազմակերպման հետ կապված խնդիրներով զբաղվելու կարիք է առաջացել:

Պատմաբան Աշոտ Ղուկասյանն ավելի քան 40 տարի է՝ աշխատում է ԿԳՄՍ նախարարության ենթակայության կառույցներում: Ասում է՝ վերջերս հանդիպում է տեղի ունեցել ԿԳՄՍ նախարարի տեղակալ Արաքսիա Սվաջյանի հետ։ Քննարկման արդյունքներից դժգոհ է մնացել:

Լուծարվող բաժնի աշխատակից Նունե Ամիրյանին ևս փոխնախարարի բացատրությունները չեն բավարարել:

Թորոսյանը, սակայն, կրճատված աշխատակիցների համար առաջարկ ունի: Բոլոր նրանց համար, ովքեր հաստիքային աշխատանք չեն ունենալու, Թորոսյանի խոսքով, կառույցում ստեղծվելու է փորձագետների շտեմարան, որտեղ ներգրավվելու համար մրցութային կարգով կարող են ընտրվել նաև կրճատված աշխատակիցները և վճարովի փորձաքննություններ կատարել:

Գործազրկության վտանգի տակ հայտնված մասնագետները, սակայն, համոզված են, որ փորձագետների շտեմարանն ընդամենը փափուկ բարձ է իրենց համար՝ առկա դժգոհությունը լռեցնելու նպատակով:

Մանրամասները՝ տեսանյութում։

Աննա Բաբաջանյան