Մեզանում մշակութային ժառանգության պահպանությունը քարե դարի մակարդակի է. ապաքաղաքական զրույց Սարհատ Պետրոսյանի հետ. ՏԵՍԱՆՅՈՒԹ

Factor TV-ի A-politic հաղորդաշարի հյուրն է ճարտարապետ Սարհատ Պետրոսյանը: Նրա կարծիքով՝ քաղաքաշինական խնդիրները հայտնվում են հանրության ուշադրության կենտրոնում այն ժամանակ, երբ ընդունվում է հերթական վիճելի որոշումը: Նման որոշումների պարագայում կոռուպցիայի վերաբերյալ կասկածները փարատելու միակ միջոցը բաց, թափանցիկ աշխատելն է: Երբ որոշումներն ընդունվում են փակ կաբինետներում, առանց հասարակական և մասնագիտական քննարկման, նման կասկածներն անխուսափելի են:

Ճարտարապետը վստահ է, որ պետությունը պետք է ունենա «գերակա շահ»՝ ճանապարհներ, ջրամբարներ, կամուրջներ կառուցելու համար: Բայց «գերակա շահը» չի կարող արտահայտվել նրանում, որ գույքը խլվում է մի սեփականատիրոջից ու փոխանցվում մեկ այլ սեփականատիրոջ, որպեսզի նա այնտեղ բնակվի կամ այդ սեփականությունից եկամուտ ստանա:

Ըստ հաղորդման հյուրի՝ պետք է պահպանել ոչ թե առանձին հուշարձանները, այլ ամբողջ միջավայրը: Նա բերում է Աբովյան փողոցի օրինակը, որը պետք է դիտարկել որպես «հուշարձան»: Սակայն չինովնիկների մանիպուլյացիաների պատճառով հուշարձան համարվեց ոչ թե փողոցն ամբողջությամբ, այլ միայն ԱՕՔՍ-ի շենքը: Արդյունքում այդ պատմական շենքից մի քանի մետր հեռավորության վրա կառուցվեց նոր բարձրահարկ շենք:

Սարհատ Պետրոսյանը համոզված է, որ ճարտարապետները պետք է խոսեն ոչ միայն քաղաքների, այլև քաղաքից դուրս գտնվող բնակավայրերի մասին՝ մարդկանց հնարավորություն տալով ապրելու իրենց նախընտրած՝ ոչ քաղաքային միջավայրերում:

Մանրամասները՝ տեսանյութում:

Արամ Աբրահամյան