30.05.2026 | 10:27
ՌԴ-ն Կոպիրկինին կանչել է Մոսկվա՝ ՀՀ–ԵՄ մերձեցման պատճառով
Ադրբեջանի Մեջլիսի նախագահը Ֆրանսիայի Սենատի բանաձևն անվանել է «կեղծավորության վառ օրինակ»
Քաղաքականություն
18.01.2024 | 22:03
Ադրբեջանի Մեջլիսի նախագահ Սահիբա Գաֆարովան Բաքվում Ղազախստանի և Տաջիկստանի դեսպանների հետ հանդիպմանն անդրադարձել է նախօրեին Ֆրանսիայի Սենատի ընդունած բանաձևին։ Նա նշել է, թե «աշխարհում կան երկակի ստանդարտներ, և որոշ երկրներ, որոնք այսօր չեն կարողանում մարսել Ադրբեջանի ձեռքբերումները, կողմնակալ և անարդար դիրքորոշում են ցուցաբերում Բաքվի նկատմամբ»։
Նրա խոսքով՝ դա հստակ տեսնում են Ֆրանսիայի վերջին պահվածքում։
Գաֆարովան Ֆրանսիայի Սենատի վերջին բանաձևը «կեղծավորության վառ օրինակ» է անվանել՝ հայտարարելով, թե «Ֆրանսիան նման քայլերով ցույց է տալիս միջազգային իրավունքի նորմերի ու սկզբունքների նկատմամբ բացահայտ անհարգալից վերաբերմունք»:
Նշենք, որ այսօր ավելի վաղ Մեջլիսի միջազգային հարաբերությունների և միջխորհրդարանական հարաբերությունների հանձնաժողովը հայտարարություն էր ընդունել Ֆրանսիայի Սենատի ընդունած բանաձևի կապակցությամբ ու կոչ արել կառավարությանը խզել տնտեսական կապերը Փարիզի հետ։
Հիշեցնենք, որ Ֆրանսիայի Սենատում բանաձևը երեկ ընդուվել է 336 կողմ և 1 դեմ ձայներով։ Այն դատապարտում է Արցախում Ադրբեջանի ռազմական հարձակումն ու ագրեսիան, Հայաստանի Հանրապետության տարածքային ամբողջականության ոտնահարման հետագա փորձերը։ Բանաձևը պահանջում է Ադրբեջանի դեմ պատժամիջոցների կիրառում և ԼՂ հայ բնակչության վերադարձի իրավունքի երաշխիքների սահմանում։
Էմմա Չոբանյան
