Չինաստանի բնակչությունը երկրորդ տարին անընդմեջ նվազում է

2023 թվականին Չինաստանի բնակչությունը կրճատվել է 2,08 միլիոնով կամ 0,2 տոկոսով՝ հասնելով 1,409 միլիարդի։  Չինաստանի Ժողովրդական Հանրապետության վիճակագրության պետական վարչության տարեկան զեկույցի համաձայն՝ անցած տարվա ընթացքում երկրում 5,7%-ով ավելի քիչ երեխա է ծնվել, քան մեկ տարի առաջ՝ 9,02 մլն։ Միևնույն ժամանակ, ծնելիության մակարդակը ռեկորդային ցածր է եղել՝ 6,39 ծնունդ՝ հազար բնակչի հաշվով, փոխանցում է Կոմերսանտը։

Զեկույցը նաև ցույց է տալիս, որ 2023 թվականին մահացությունների թիվը, 2022 թվականի համեմատ, աճել է 6,6 տոկոսով։ Մահացել է 11,1 մլն մարդ, իսկ մահացության ցուցանիշը, այսինքն՝ մահերի թիվը հազար բնակչի հաշվով, կազմել է 7,87։ Սա ամենաբարձր ցուցանիշն է 1974 թվականից ի վեր։

Բնակչության բնական աճը, ըստ զեկույցի, կազմել է մինուս 1,48՝ հազար մարդու հաշվով։

Վիճակագրությունը ցույց է տալիս, որ Չինաստանի արական սեռի բնակչությունը կազմում է 720,3 միլիոն, իսկ կին բնակչությունը՝ 689,35 միլիոն։ Բնակչության ամենամեծ բաժինը կազմում են 16-ից 59 տարեկան մարդիկ՝ 61,3% կամ 864,8 մլն։

Տարվա ընթացքում քաղաքային բնակչությունն աճել է 11,96 մլն-ով՝ կազմելով 932,67 մլն մարդ, իսկ գյուղական բնակավայրերի մշտական բնակչությունը նվազել է 14,4 մլն-ով՝ մինչև 477 միլիոն մարդ:

Չինաստանի բնակչությունը երկրորդ տարին անընդմեջ նվազում է. 2022 թվականին կրճատումը գրանցվել է 1961 թվականից ի վեր առաջին անգամ։ 2023 թվականի ընթացքում ազգային և տարածաշրջանային իշխանությունների կողմից իրականացված ծնելիության բարձրացմանն ուղղված բազմաթիվ միջոցառումները շոշափելի արդյունք չեն տվել։