Ռուսական ավիաընկերությունները խնդրել են թույլատրել 50 տարվա վաղեմության ինքնաթիռներով թռիչքները՝ պատժամիջոցների հետևանքով նոր տեխնիկայի բացակայության պատճառով

Սիբիրյան երկու ավիաընկերություններ խնդրել են կառավարությանը երկարացնել 50-ամյա Ան-24 և Ան-26 ինքնաթիռների շահագործման ժամկետը, քանի որ արևմտյան պատժամիջոցների պատճառով դրանց փոխարինող ոչինչ չկա, Reuters-ին ասել է Angara Airlines-ի գործադիր տնօրեն Սերգեյ Զորինը:

Նրա խոսքով՝ ներկայում շահագործվում է գրեթե 100 նման ինքնաթիռ, սակայն դրանց մի զգալի մասը պետք է շահագործումից հանվի այս տարի։

«Մինչև 2030 թվականն այդ ինքնաթիռների մեկ քառորդը պետք է դուրս գրվի»,- հավելել է նա:

Սակայն դրանց փոխարինողներ չկան, իր հերթին ասել է «Բևեռային ավիաուղիներ»-ի տեխնիկական գծով տնօրեն Ալեքսեյ Եվսեևը։

«Ան-24-ն ու Ան-26-ը եղել և մնում են Յակուտիա ուղևորների ու բեռների փոխադրման միակ միջոցը»,- ընդգծել է նա։

ՌԴ Արդյունաբերության և առևտրի նախարարությունը նշել է, որ ուսումնասիրում են ավիաընկերությունների առաջարկները՝ օգտագործել «Ան» ինքնաթիռները, քանի դեռ դրանք չեն սկսել փոխարինվել նմանատիպ բնութագրերով «Լադոգա» ինքնաթիռներով։

Ավիաընկերությունն իր առաջին նոր ինքնաթիռը կարող է ստանալ 2027 թվականից ոչ շուտ, կարծում է Զորինը։ Սա երկու տարի ուշ է, քան նախապես խոստացել էր կառավարությունը։ Մասնավորապես, 2025 թվականին պետք է արտադրվեին 15 «Լադոգա»-ներ, իսկ մինչև 2027 թվականը նախատեսվում էր դրանց թիվը հասցնել 65-ի։

«Ան» ինքնաթիռները ստեղծելիս նախատեսվում էր դրանք շահագործել 60 տարի։ Դրանք նախագծվել են 1950-ականներին և արտադրվել են Կիևում 1960-ական թվականներին, սակայն վերջին 10 տարիներին այլևս չեն արտադրվում։ Այս ինքնաթիռները կարող են տեղավորել մինչև 50 ուղևորի և օգտագործվում են հիմնականում Սիբիր և Հեռավոր Հյուսիս թռիչքների համար։