«Ելք»-ը հերքում է՝ իրենք Ռոբերտ Քոչարյանին կալանքից ազատելու համար անձնական երաշխավորություն չեն ներկայացրել

Հայաստանի երկրորդ նախագահ Ռոբերտ Քոչարյանին կալանքից ազատելու համար 45 պատգամավոր անձնական երաշխավորություն է ներկայացրել։

45-ից հայտնի են միայն 3-ի անունները՝ ԱԺ նախագահ Արա Բաբլոյան, ԱԺ փոխնախագահներ Արփինե Հովհաննիսյան և Էդուարդ Շարմազանով։

Ստորագրողների մեծ մասն, ըստ լուրերի, ՀՀԿ խմբակցությունից են, ՀՅԴ-ից չէին բացառել, որ իրենց պատգամավորներից էլ կարող է ստարոգրած լինել, բայց և պաշտոնապես ոչ հաստատել են, ոչ էլ անուններ հրապարակել։

Երեկ համացանցում լուր էր շրջանառվում, որ Ռ․ Քոչարյանի համար երաշխավորություն ներկայացրած պատգամավորների անունները գաղտնի են պահվում, քանի որ նրանց մեջ կան նաև «Ելք»-ից պատգամավորներ։

«Ելք» դաշինքի «Լուսավոր Հայաստան» կուսակցության պատգամավոր Էդմոն Մարուքյանը, սակայն հակադարձում է, ասելով, որ դա ապատեղեկատվություն է, «Պաշտոնապես հերքում եմ այս ապատեղեկատվությունը և այն տարածողներին հորդորում եմ ձեռնպահ մնալ «Ելք» դաշինքի վերաբերյալ նման ճղճիմ լուրեր տարածելուց»,- գրել է պատգամավորը։

«Ելք» խմբակցության մեկ այլ պատգամավոր Ալեն Սիմոնյանը Factor.am-ին վստահեցրեց, որ նման բան լինել չի կարող․ «Ես ընդհանրապես բացառում եմ, որ «Ելք»-ից որևէ մեկը ստորագրած լինի։ Բացառված է»,- ասաց մեր զրուցակիցը։ Ի դեպ, «Ծառուկյան» դաշինքի պատգամավոր Վահե Էնֆիաջյանն էլ Factor.am-ին ավելի վաղ ասել էր, որ իրեն հայտնի չէ «Ծառուկյան» դաշինքի որևէ պատգամավոր, որն անձնական երաշխավորություն ներկայացրած լինի Երկրորդ նախագահի խափանման միջոցը փոխելու համար։

Լիլիթ Շաբոյան