Դեռ շատ անելիքներ կան, ԱՄՆ-ը պատրաստ է սատարել ՀՀ-ի և Ադրբեջանի միջև խաղաղության գործընթացը․ Ջեյմս Օ՛Բրայեն

Եվրոպայի և Եվրասիայի հարցերով ԱՄՆ պետքարտուղարի տեղակալ Ջեյմս Օ՛Բրայենը հայտարարել է, որ Վաշինգտոնն աջակցում է «Հայաստանի ու Ադրբեջանի միջև խաղաղության համաձայնագրին, կայուն ու արժանապատիվ խաղաղությանը»։

«Մենք շատ ոգևորված ենք, որ (Ադրբեջանը և Հայաստանը) շարունակում են ունենալ հուսալի օրակարգ և երկկողմ հիմունքով լուծում են չլուծված խնդիրները»,- լրագրողների հետ ճեպազրույցում ասել է Ջեյմս Օ՛Բրայենը, փոխանցում է ադրբեջանական Թուրան գործակալությունը։

«Դեռ շատ անելիքներ կան, մենք պատրաստ ենք օգտակար լինել այնքան, որքան կարող ենք»,- նշել է պետքարտուղարի տեղակալը։

Նա հավելել է, որ ԱՄՆ-ը «բավարար հարաբերություններ» ունի երկու երկրների հետ՝ ինչպես տնտեսական անվտանգության, այնպես էլ քաղաքական կապերի առումով, և կցանկանային տեսնել, որ «երկու երկրներն էլ օգտվում են խաղաղության համաձայնագրից»։

«Եվ մենք կաշխատենք այդ ուղղությամբ բոլոր ընդունելի միջոցներով։ Դա հիանալի հնարավորություն է երկու կառավարությունների համար էլ՝ իրենց ժողովուրդների համար ավելին անելու։ Հայաստանում բարեփոխումների ծրագիրը շատ տպավորիչ է։ Ադրբեջանում մոտենում են ընտրությունները, և ես տեղյակ եմ, թե ինչ դեր է այն ցանկանում խաղալ տարածաշրջանային տնտեսական զարգացման գործում։ Ուստի, խաղաղության համաձայնագիրը միայն կնպաստի այս ծրագրերին»,- ասել է Օ՛Բրայենը՝ նշելով, որ Վաշինգտոնը կցանկանար քննարկել բոլոր հարցերը, որոնք կան օրակարգում երկու երկրների հետ՝ «կալանքի տակ գտնվող որոշ անձանց հետ կապված մտահոգություններից մինչև երկկողմանի հարցեր»։

Էմմա Չոբանյան