Քաղաքականություն
04.12.2023 | 23:04
Թուրքիայի նախագահ Ռեջեփ Թայիփ Էրդողանը Կատարի էմիր շեյխ Թամիմ բեն Համեդ Ալ-Թանիի հրավերով դեկտեմբերի 4-5-ը պաշտոնական այցով Կատար կլինի։ Այս մասին հայտնել է Թուրքիայի նախագահի աշխատակազմը, գրում է Անադոլու գործակալությունը։
Հաղոդվում է, որ Էրդողանը մասնակցելու է Թուրքիա-Կատար ռազմավարական համագործակցության բարձրագույն կոմիտեի 9-րդ նիստին, որը տեղի է ունենալու Դոհայում՝ երկու երկրների ղեկավարների նախագահությամբ։
Հանդիպման մասնակիցները քննարկելու են թուրք-կատարական հարաբերությունների ամբողջ սպեկտրը և տարբեր ոլորտներում երկու երկրների միջև համագործակցության հետագա խորացման հնարավորությունները։ Նախատեսվում է մտքերի փոխանակում երկկողմ հարաբերությունների իրավիճակի, ինչպես նաև տարածաշրջանային և գլոբալ խնդիրների, առաջին հերթին՝ Գազայի հատվածում Իսրայելի ռազմական գործողությունների վերաբերյալ։
Բացի այդ, նախատեսվում է մի շարք երկկողմ համաձայնագրերի ստորագրում, որոնք պետք է զգալի ներդրում ունենան երկու երկրների կապերի զարգացման գործում։ Այցի շրջանակում Թուրքիայի նախագահը մասնակցելու է նաև Պարսից ծոցի արաբական երկրների համագործակցության խորհրդի նիստին։
Factor TV-ն ավելի վաղ անդրադարձել էր տեղեկություններին, որ Էրդողանը մեկնում է Պարսից ծոցի երկրներ՝ ֆինանսավորում փնտրելու 23,5 միլիարդ դոլարի չափով տրանսպորտային ենթակառուցվածքի համար, որը Թուրքիայի միջոցով Ասիան կկապի Եվրոպային։
Էմմա Չոբանյան
