Քաղաքականություն
01.12.2023 | 23:30
Թուրքիայի նախագահ Ռեջեփ Թայիփ Էրդողանն այս շաբաթ Պարսից ծոցի երկրներ կատարած այցի շրջանակում ֆինանսավորում կփնտրի Արաբական Միացյալ Էմիրություններից և Կատարից՝ 23,5 միլիարդ դոլարի չափով տրանսպորտային ենթակառուցվածքի համար, որը Թուրքիայի միջոցով Ասիան կկապի Եվրոպային, գրում է Bloomberg-ը։
Նախագծերը, որոնք նա քննարկելու է, ներառում են երկաթուղիների և ճանապարհների ցանց Պարսից ծոցի իրաքյան Ֆաո նավահանգստից մինչև հյուսիսում գտնվող Թուրքիայի սահմանը, ինչպես նաև Ստամբուլի Բոսֆորի նեղուցով անցնող երկաթգիծը, որը կապում է երկու մայրցամաքները, Bloomberg-ին ասել է տրանսպորտի և ենթակառուցվածքների նախարար Աբդուլքադիր Ուրալօղլուն։
«Մենք խոսում ենք 8-10 միլիարդ դոլարի ներդրումների մասին առաջին փուլում, որը կավելանա՝ հասնելով մինչև մոտ 20 միլիարդ դոլարի», – ասել է նա իրաքյան նախագծի մասին, որը կոչվում է Զարգացման ճանապարհ:
Սպասվում է, որ Բոսֆորի երկաթուղային հաղորդակցությունը կարժենա 3-3,5 միլիարդ դոլար։
Էրդողանն արդեն այցով ԱՄԷ-ում է, որտեղ մասնակցում է COP28 կլիմայական գագաթնաժողովին, հաջորդ շաբաթվա սկզբին էլ կմեկնի Կատար:
Թուրքիան հավակնում է դառնալ դեպի Եվրոպա արտահանման խողովակ՝ առևտրային ուղիների շուրջ աճող մրցակցության պայմաններում: Ուրալօղլուն նշել է, որ Զարգացման ճանապարհն ավելի կարճ կլինի, քան ԱՄՆ-ի կողմից սեպտեմբերին հայտարարված Մերձավոր Արևելք-Հնդկաստան առևտրային միջանցքը, թեև բեռների պահանջարկը կարող է բավարար լինել երկու նախագծերին աջակցելու համար:
Սաուդյան Արաբիան և ԱՄԷ-ն ներգրավված են ԱՄՆ-ի աջակցությունը վայելող Հնդկաստան-Մերձավոր Արևելք-Եվրոպա տնտեսական միջանցքում, մինչդեռ Չինաստանն արդեն ընդլայնել է իր ազդեցությունը էներգիայով հարուստ տարածաշրջանում՝ իր «Գոտի և ճանապարհ» ենթակառուցվածքային ներդրումներով:
Թուրքիան նաև հույս ունի համաձայնության գալ Պարսից ծոցի արաբական երկրների հետ՝ Իզմիր քաղաքում գտնվող Ալսանջակ նավահանգիստը համատեղ շահագործելու համար:
«Մենք բանակցություններ ենք վարում Ծոցի տարածաշրջանի հետ։ Դա ոչ թե վաճառք է, այլ գործընկերություն։ Շուտով կարող է զարգացում լինել»,- ասել է Ուրալօղլուն։
Էմմա Չոբանյան
