Հայաստանում «ֆասթ ֆուդն» ավելի թանկ է, քան առողջ սնունդը. ապաքաղաքական զրույց Դավիթ Պիպոյանի հետ. ՏԵՍԱՆՅՈՒԹ

Factor TV-ի A-politic հաղորդաշարի հյուրն է Գիտությունների ազգային ակադեմիայի Էկոկենտրոնի սննդի ռիսկերի գնահատման կենտրոնի ղեկավար Դավիթ Պիպոյանը: Նրա կարծիքով՝ սննդային սովորույթներում վերջին տասնամյակների փոփոխությունները տեղի են ունենում գլոբալիզացիայի, սննդի միջազգային ցանցերի և տեխնոլոգիաների սրընթաց զարգացման ազդեցության տակ: Որոշ իմաստով հեշտացնելով մարդկանց կյանքը՝ այդ գործընթացն ունի նաև իր բացասական հետևանքները, մասնավորապես, երիտասարդ սերնդի ներկայացուցիչները չեն ցանկանում ուտելիք պատրաստել տանը: «Ֆաստ ֆուդի» համատարած օգտագործումը նպաստում է նաև սննդի ոլորտում ազգային ավանդույթների վերացմանը:

Արդյո՞ք ազգային սովորույթները պայմանավորված են մարդկանց սոցիալական խնդիրներով, թե՞ մշակութային ավանդույթներով: Անդրադառալով այդ հարցին՝ սննդագետը պատասխանում է՝ «և-և»: Ակնհայտ է, որ ցածր եկամուտներ ունեցող մարդը չի կարող իր համար ապահովել լիարժեք առողջ սննդակարգ: Բայց հնարավոր չէ պնդել հակառակը. բարեկեցիկ կյանքն ամենևին զերծ չի պահում մարդկանց վնասակար սովորույթներից: Ընդ որում, հարղորդման հյուրը հետաքրքիր տեղեկություն է հայտնում․ ի տարբերություն աշխարհի շատ երկրների՝ «ֆաստ ֆուդը» Հայաստանում ավելի թանկ է, քան բազմաթիվ՝ շատ ավելի առողջ կերակրատեսակներ:

Ըստ Դավիթ Պիպոյանի՝ մսակերների և բուսակերների «հակամարտությունը» մեր հասարակության մեջ անհանդուժողականության դրսևորումներից մեկն է: Որպես մասնագետ՝ նա նշում է, որ այն նյութերը, որոնք տալիս է միսը, չեն կարող փոխարինվել այլ նյութերով՝ հատկապես, երբ խոսքն անչափահասների մասին է: Բայց որևէ կողմից ստիպողականությունը հաճախ բերում է ճիշտ հակառակ հետևանքների:

Մանրամասները՝ տեսանյութում:

Արամ Աբրահամյան