11.06.2026 | 16:53
Վուչիչը հայտարարել է Սերբիայի նախագահի պաշտոնից շուտով հրաժարական տալու մասին․ նա մտածում է վարչապետ առաջադրվելու մասին
Ադրբեջանի իշխանությունները լռեցնում են իրենց քննադատներին կասկածելի քրեական մեղադրանքներով․ HRW-ը՝ Բաքվում անկախ լրագրողների նկատմամբ ճնշումների մասին
Քաղաքականություն
24.11.2023 | 20:36
Human Rights Watch միջազգային իրավապաշտպան կազմակերպությունն անդրադարձել է Ադրբեջանում անկախ լրատվամիջոցի աշխատակիցների ձերբակալություններին։ Նշվում է, որ Ադրբեջանի իշխանությունները կոռուպցիայի հետաքննության և բացահայտման համար կալանավորել են անկախ Abzas Media լրատվամիջոցի ղեկավարներ Ուլվի Հասանլիին և Սևինջ Վաքըֆքըզիին։ Իշխանությունները նաև ձերբակալել են ձեռնարկատեր Մոհամադ Կեկալովին, որը նույնպես աշխատել է Abzas Media-ի հետ:
Նոյեմբերի 21-ին էլ Բաքվի Խաթայի շրջանային դատարանը 4 ամսով նախնական կալանք է սահմանել Հասանլիի և Վաքըֆքըզիի նկատմամբ: Լրագրողներին սպառնում են կազմակերպված խմբի կողմից մաքսանենգության կեղծ մեղադրանքներ են ներկայացրել և կարող են դատապարտվել մինչև ութ տարվա ազատազրկման։ Դատարանը երկարատև խափանման միջոցը հիմնավորող կոնկրետ փաստեր չի ներկայացրել։
«Ադրբեջանի իշխանությունները կասկածելի, պատժիչ քրեական մեղադրանքներ են առաջացրում իրենց քննադատներին։ Հասանլիի, Վաքըֆքըզիի և Կեկալովի կալանավորումները հանդիսանում են այս երկարամյա պրակտիկայի վերջին օրինակը, նրանք պետք է անմիջապես ազատ արձակվեն»,- ասել է Human Rights Watch-ի Եվրոպայի և Կենտրոնական Ասիայի փոխտնօրեն Գիորգի Գոգիան:
Ըստ HRW-ի՝ խափանման միջոցը պետք է լինի վերջին միջոցը, որը հիմնավորված է կոնկրետ փաստերով և մեղադրյալի համար առնչվող անձնական հանգամանքներով, որը բացակայում է Բաքվի պարագայում։
Abzas Media-ն անկախ առցանց լրատվական հարթակ է, որը լուսաբանում է Ադրբեջանում իրադարձությունները և հաճախ հաղորդում է երկրում կոռուպցիայի մասին: Հասանլին նաև NIDA երիտասարդական շարժման նախկին անդամ է, որի խորհրդի անդամները քրեական հետապնդման են ենթարկվել և բանտարկվել կեղծ քրեական մեղադրանքներով 2014 թվականին:
Վաքիֆքըզին էլ ադրբեջանցի հայտնի հետաքննող լրագրող է։ Նախկինում նա փաստագրել և բացահայտել է բարձր մակարդակի կոռուպցիան, ներառյալ՝ նախագահի, նրա ընտանիքի և նրա կաբինետի անդամների հետ կապված։ Ադրբեջանի իշխանությունները նրան արգելել էին արտասահման մեկնել 2015-2019 թվականներին: 2021 թվականին նա այն լրագրողներից մեկն էր, ում հեռախոսը կոտրվել էր Pegasus լրտեսական ծրագրով։
Հասանլիի, Վաքըֆքըզիի և Կեկալովի ձերբակալությունները հաջորդել են հունիսին հայտնի գիտնական և ակտիվիստ Գուբադ Իբադողլուի ձերբակալությանը՝ կեղծ փողերի արտադրության, ձեռքբերման կամ վաճառքի ու ծայրահեղականության կեղծ մեղադրանքներով:
«Թեև մեղադրանքները տարբեր են, սակայն մտադրությունը, կարծես, նույնն է՝ խլացնել կառավարությանը քննադատողներին և սարսափազդու ազդանշաններ ուղարկել Ադրբեջանի խիզախ լրագրողներին և ակտիվիստներին»,- ասել է Գոգիան:
Նա նշել է, որ իշխանությունները նրանց պետք է անհապաղ ազատ արձակեն ու հանեն կեղծ մեղադրանքները։
Հավելենք, որ Factor TV-ն ավելի վաղ անդրադարձել էր ադրբեջանական անկախ լրատվամիջոցի լրագրողների հետապնդմանն ու ձերբակալություններին։
Էմմա Չոբանյան
