Գերմանիայի ԱԳ նախարարը տարածաշրջան այցից առաջ Հայաստանին և Ադրբեջանին հաշտության կոչ է արել

Գերմանիան և Եվրոպան ցանկանում են «համատեղ աշխատել Հարավային Կովկասի երկրների հետ՝ ստեղծելու մի տարածաշրջան, որը կհաղթահարի անցյալի ստվերները և կձևավորի ապագայի ժողովրդի շահերը»: Այս մասին Հայաստան և Ադրբեջան երկօրյա այցի մեկնարկից առաջ հայտարարել է Գերմանիայի արտգործնախարար Անալենա Բերբոքը, գրում է DW-ի ռուսական ծառայությունը։

Մեկնաբանելով Լեռնային Ղարաբաղի երկարատև հակամարտությունը՝ Բերբոքը նշել է, որ այն հսկայական վերքեր է պատճառել երկու կողմերին, սակայն «երկարաժամկետ հեռանկարում դրանք կարող են բուժվել»։

«Այժմ կարևոր է, որ բոլոր նրանք, ովքեր կրում են խաղաղության բանալիները, հաղթահարեն իրենց և բռնեն փոխադարձ վստահության ճանապարհը»,- ասել է նա:

Բերբեքը նշել է, որ այս ճանապարհին Գերմանիան և ԵՄ-ն պատրաստ են կոնկրետ նախաձեռնություններով աջակցել Երևանին և Բաքվին։ Դրանցից մեկն էլ ԵՄ Global Gateway ծրագրի շրջանակում տվյալների փոխանցման համար Սև ծովի հատակով նախատեսված ստորջրյա մալուխի անցումն է։ Ըստ Բերբոքի՝ այս նախագծին մասնակցելը կարող է Հայաստանին և Ադրբեջանին ավելի մոտեցնել միմյանց, ինչպես նաև Եվրոպային։

Global Gateway նախաձեռնությունը նախատեսում է մինչև 300 միլիարդ եվրոյի ներդրումներ զարգացող և անցումային տնտեսություն ունեցող երկրների ենթակառուցվածքներում։ Մալուխի անցկացման ընդհանուր արժեքը կազմում է 45 միլիարդ եվրո։ Եվրոպական ներդրումային բանկը պատրաստ է իր վրա վերցնել այս գումարի գրեթե կեսը։

Հիշեցնենք, որ այսօր նախատեսվում է Գերմանիայի ԱԳ նախարարի այցը Հայաստան, վաղը նա կմեկնի Ադրբեջան։

Էմմա Չոբանյան