Իտալիայի ԳՇ պետն Ադրբեջանում ռազմական համագործակցության հարցեր է քննարկել

Բաքու է մեկնել Իտալիայի Զինված ուժերի գլխավոր շտաբի պետ, ծովակալ Ջուզեպպե Կավո Դրագոնեն, որը հանդիպել է Ադրբեջանի ԳՇ պետ Քերիմ Վելիևի հետ։ Ադրբեջանի ՊՆ-ն հայտնում է, որ ԳՇ պետերի հանդիպումը տեղի է ունեցել ինչպես անձնազրույցի ձևաչափով, այնպես էլ ընդլայնված կազմով։

Հանդիպմանը Վելիևն ուշադրություն է «հրավիրել ադրբեջանական բանակում առաջադեմ տեխնոլոգիաների ներդրման և կիբերանվտանգության ոլորտում կատարված աշխատանքների կարևորության վրա»։

Դրագոնեն իր հերթին նշել է երկու երկրների միջև ռազմական համագործակցության ընդլայնման լայն հնարավորությունների մասին։

«Հանդիպմանը հատկապես ընդգծվել է Ադրբեջանի և Իտալիայի միջև ռազմավարական գործընկերության վրա հիմնված ռազմական հարաբերությունների հետագա ընդլայնման անհրաժեշտությունը։ Կողմերը, ի թիվս այլ հարցերի, քննարկել են Ադրբեջանի և Իտալիայի միջև ռազմական, ռազմատեխնիկական, ռազմակրթական ու այլ ոլորտներում համագործակցության զարգացման հեռանկարները, ինչպես նաև փոխադարձ հետաքրքրություն ներկայացնող մի շարք հարցեր»,- ասվում է հաղորդագրության հետ։

Հավելենք, որ վերջին տարիներին, հատկապես՝ Արցախյան 44-օրյա պատերազմից հետո, Բաքվի և Հռոմի միջև ռազմական շփումները բավական ակտիվացել  են, տեղի են ունենում նաև հաճախակի փոխայցելություններ։

Իտալիայի ԳՇ պետի այս այցը տեղի է ունենում Արցախում էթնիկ զտման և այն հրապարակումների ֆոնին, որ Բաքուն ցանկանում է Իտալիայից սպառազինություն գնել։ Մասնավորապես, իտալական La Repubblica-ն սեպտեմբերին հրապարկամամբ հայտնել էր, որ Ադրբեջանի իշխանություններն ամիսներ շարունակ բանակցել են Իտալիայի հետ զենքի գնման շուրջ։ Լրատվամիջոցի տվյալներով՝ Բաքուն ակնկալում է ձեռք բերել ուսումնական ինքնաթիռներ, ինքնաձիգներ, զենիթային համակարգեր, ռազմատրանսպորտային ինքնաթիռներ, սուզանավեր։ Գործարքի ընդանուր արժեքը գնահատվում է 1-2 միլիարդ եվրո։

Լրատվամիջոցը, միաժամանակ, նշում էր, որ Ղարաբաղում վերջին իրադարձությունները հիմա խնդիր են Իտալիայի կառավարության համար։ Բոլոր պայմանագրերը դեռ արգելափակված են UAMA-ի հատուկ գերատեսչության թույլտվության բացակայության պատճառով, որը վերահսկում է իտալական զենքի մատակարարման թույլտվությունների տրամադրումը։ 1992 թվականի կանոնների համաձայն՝ զենքը չի կարող վաճառվել երկրի, որը գտնվում է հակամարտության մեջ։ Ըստ լրատվամիջոցի՝ դրա հետ կապված Բաքուն սկսել է այլընտրանքային արտադրողների փնտրել Թուրքիայում և Իսրայելում։

Հունիսին էլ իտալական Leonardo կոնցեռնը հայտարարել էր Ադրբեջանի ռազմաօդային ուժերի համար C-27J տրանսպորտային ինքնաթիռների մատակարարման պայմանագրի կնքման մասին։ Ստորագրման արարողությանը մասնակցել էին երկու երկրների ՊՆ ներկայացուցիչները։

Էմմա Չոբանյան