Ոսկեպարի շրջափակման վտանգ. ինչի կհանգեցնի անկլավներն Ադրբեջանին հանձնելը. ՏԵՍԱՆՅՈՒԹ

«Այս երեք տունն ընկնում է Ադրբեջանի սահմանում, պատկերացրու՝ հնարավոր է, որ Ադրբեջանի զինվորն այստեղ կանգնի, այստեղ մեծ թաղամաս կա, ո՞վ իր էրեխային ավտոմատի գյուլի տակ կպահի»․ Ոսկեպարի բնակիչ Նվեր Բեգլարյանն այսպիսի սցենարի մասին է խոսում, եթե անկլավների փոխանակում տեղի ունենա։

Խորհրդային տարիների անկլավներից Վերին Ոսկեպարը գտնվում է Ոսկեպար գյուղի հարևանությամբ։ Այդ հատվածով է անցնում ոչ միայն Ոսկեպարի, այլ նաև ՀՀ-ի համար կենսական նշանակություն ունեցող Մ 16 միջպետական ավտոճանապարհը։

Ոսկեպարցիները հիշում են՝ խորհրդային տարիներին Տավուշի մարզի սահմանամերձ հայկական գյուղերում ադրբեջանցիների հետ խաղաղ են ապրել, առևտրից մինչև միմյանց տուն հյուր գնալ-գալ է եղել։

84-ամյա Ժորա Սեփխանյանը հիմա սա անիրատեսական է համարում։ Ասում է՝ ադրբեջանցիները թշնամի են հայերին, սա հաղթահարելու համար, ըստ ոսկեպարցու, մեկ դարն էլ է քիչ ժամանակ։

Ոսկեպարում աշխատատեղերի խնդիր կա, մեծահասակներն ասում են՝  երիտասարդները լքում են գյուղը։ Անորոշ քննարկումներն անկլավների շուրջ անորոշ են դարձնում նաև ոսկեպարցիների կյանքը։

Շամամ Հարությունյանը Ոսկեպարում է ապրում ծնված օրվանից՝ արդեն 86 տարի։ Ասում է՝ վերջին երկու տարում ադրբեջանական կողմը գյուղի ուղղությամբ չի կրակել, բայց մինչ այդ Ոսկեպարը մշտապես է թիրախում եղել։ Հիմա էլ անկլավների թեման է անհանգստացնում տիկին Շամամին։

Ոչ թե ոսկեպարցին կհեռանա իր հայրենիքից, այլ ադրբեջանցիներին թույլ չեն տա Ոսկեպարի տարածքով անցնել՝ վճռական ասում է գյուղի մեկ այլ բնակիչ։

Ադրբեջանին նոր տարածքներ հանձնելը Ոսկեպարում կարմիր գիծ են համարում։ 30 տարի անց մարդկանց հիշողությունից դեռ չի ջնջվել, թե ինչպես էին իրենց տները քանդում։

Անկլավների թեման քննարկումների կենտրոնում հայտնվեց 44-օրյա պատերազմից հետո։ Այդ տարածքները, սակայն, ոչ թե ադրբեջանական են, այլ Խորհրդային միության տարիներին անասնապահությամբ զբաղվելու համար տրվել են ադրբեջանցի հովիվներին։ Ոսկեպարցիները շեշտում են՝ Ադրբեջանն իրենց գյուղի տարածքում պատմական հողեր երբեք չի ունեցել։

Մանրամասները՝ տեսանյութում։

Նարեկ Կիրակոսյան