Երևանը մենք քանդում ենք մեր ձեռքով, քանդում ենք մեր հիշողությունները. ապաքաղաքական զրույց Գևորգ Տեր-Գաբրիելյանի հետ. ՏԵՍԱՆՅՈՒԹ

Factor TV-ի A-politic հաղորդաշարի հյուրն է արձակագիր, Եվրասիա համագործակցություն հիմնադրամի տնօրեն Գևորգ Տեր-Գաբրիելյանը: Նրա կարծիքով՝ գրողները կարողանում են լավագույնս արտացոլել ժամանակի հոսքը և հետաքրքիր դարձնել իրենց ժամանակը: Այդ իմաստով ճգնաժամը եղել է միշտ, պարզապես առաջ մարդիկ ավելի քիչ տեղեկություններ ունեին, թե ինչ է կատարվում աշխարհում, հարևան կամ հեռավոր երկրներում: Հակառակ դեպքում՝ կիմանային, որ մշտապես ինչ-որ մի տեղ դժբախտություններ, աղետներ, պատերազմներ են տեղի ունենում:

Անդրադառնալով եվրոպական քաղաքակրթությանը՝ հաղորդման հյուրը կարծիք է հայտնում, որ Եվրոպան ոչ միայն անցել է բազմաթիվ արյունահեղությունների, արհավիրքների միջով, այլև կարողացել է դրանք իմաստավորել, արձանագրել, այդ պատճառով հենց այդ երկրամասում են ձևավորվել համամարդկային արժեքները: Դրանով Եվրոպան իրավունք է ձեռք բերել խոսելու ամբողջ մարդկության անունից:

Արձակագրի ստեղծագործություններում կա՞ 1970-80-ականների և, մասնավորապես, այն Երևանը, որը կար իր պատանեկության տարիներին: Գևորգ Տեր-Գաբրիելյանի համոզմամբ՝ սթափ վերլուծությունը չի կարող իր մեջ կարոտախտ պարունակել: Խնդիրը, ըստ նրա, սրճարանների կամ ժամանցի վայրերի առատությունը չէ: Գրողի կարծիքով՝ մենք մեր ձեռքով քանդում ենք Երևանը, որովհետև քանդում ենք մեր հիշողությունները, կորցնում ենք այն պատմությունները, որոնք կապված են քաղաքի հետ:

Մանրամասները՝ տեսանյութում:

Արամ Աբրահամյան