02.11.2024 | 13:09
Նոյեմբերի 1-ին «Երևանի ավտոբուս» ՓԲԸ-ի կողմից հավաքագրվել է 31 678 200 ՀՀ դրամ
ԵՄ գազի արտահանումը կրկնապատկելու՝ Ադրբեջանի ծրագրերը վտանգի տակ են․ Bloomberg
Քաղաքականություն
09.10.2023 | 15:18
Ադրբեջանի ծրագրերը՝ կրկնապատկելու ԵՄ գազի արտահանումը, վտանգի տակ են, քանի որ բանակցությունները մտել են փակուղի։ Այս մասին հայտնում է Bloomberg-ը՝ վկայակոչելով իր աղբյուրներին։
Ըստ տեղեկությունների՝ Ադրբեջանը մատակարարման պայմանների շուրջ բանակցություններ է վարել ավելի քան 10 եվրոպական երկրների հետ, սակայն դրանք արդյունք չեն տվել։ Գազի գնման հարցում դիրքորոշման փոփոխությունը տեղի է ունեցել Եվրոպայում էներգետիկ ճգնաժամի թուլացումից հետո։
Լրատվամիջոցը գրում է, որ եվրոպացի գնորդներն այժմ տատանվում են գալիք տասնամյակների ընթացքում հանածո վառելիքին հավատարիմ մնալու հարցում, իսկ այլ տարբերակները, ինչպիսիք են լրացուցիչ հեղուկացված բնական գազը, ԱՄՆ-ից Կատար կսկսեն հոսել առաջիկա մի քանի տարիների ընթացքում: Ի տարբերություն մշտական խողովակաշարերի՝ հեղուկ բնական գազի նոր ենթակառուցվածքների մեծ մասը ներառում է լողացող ներմուծման տերմինալներ, որոնք կարող են անջատվել և տեղափոխվել այլ վայր, երբ պահանջարկը նվազի:
«Ադրբեջանից նոր խողովակաշարի ընդլայնման ժամկետը մարտահրավեր է նախագծի համար, քանի որ 2027 թվականից շուկայում ակնկալվում է ավելցուկ մատակարարման կուտակում հեղուկ գազի համաշխարհային շուկաներում»,- ասել է Սինդրե Կնուտսոնը՝ գազի և LNG շուկայի հետազոտման գործընկեր Օսլոյում գտնվող Rystad Energy-ում:
Նշվում է նաև, որ այստեղ իր դերակատարումն ունի աշխարհաքաղաքական իրավիճակը։ Մասնավորապես, ըստ լրատվամիջոցի՝ «Ադրբեջանի կողմից Լեռնային Ղարաբաղի տարածաշրջանի գրավումը, որը ստիպեց մոտ 100,000 հայերի փախչել Հայաստան՝ էթնիկ զտումների վախի պատճառով, կարող է ազդել եվրոպացի գնորդների ցանկացած որոշումների վրա»։
«Հայաստանի և Ադրբեջանի միջև վերջին իրադարձությունների հետ կապված, կարծում եմ, Ադրբեջանը կրակել է իր ոտքին։ Կարծում եմ՝ ադրբեջանական գազը կմնա այնտեղ, որտեղ կա, մինչև Թուրքիան ավելին չցանկանա»,- ասել է Նյու Յորքի Կոլումբիայի համալսարանի Գլոբալ էներգետիկ քաղաքականության կենտրոնի հետազոտող Աննա Սոֆի Քորբոնը։
Հիշեցնենք, որ անցյալ տարվա հուլիսի 18-ին Ադրբեջանի և Եվրամիության միջև ստորագրված էներգետիկ ոլորտում համագործակցության մասին փոխըմբռնման հուշագրի համաձայն՝ առաջիկա հինգ տարում Եվրոպա գազի մատակարարումները կրկնապատկվելու են՝ մինչև 20 միլիարդ խորանարդ մետր:
Էմմա Չոբանյան
