Պուտինն ասել է, թե Ալիևն իրեն խոստացել է ապահովել ԼՂ հայերի անվտանգությունը, սակայն այնտեղ պարզապես հայ չի մնացել

Ադրբեջանի նախագահ Իլհամ Ալիևը ՌԴ նախագահ Վլադիմիր Պուտինին խոստացել է ապահովել ԼՂ-ում հայ բնակչության անվտանգությունը, սակայն այնտեղ պարզապես հայ չի մնացել։ Այս մասին Պուտինը հայտարարել է «Վալդայ» ակումբում ունեցած ելույթում։

«Ես, ինչպես գիտեք, հեռախոսով խոսել եմ նախագահ Ալիևի հետ, բայց մենք նախկինում էլ ենք խոսել այս մասին… Նա ինձ վստահեցրել է, որ ինչ էլ լինի, ինքը կապահովի Լեռնային Ղարաբաղի հայ բնակչության անվտանգությունն ու իրավունքները»,- ասել է Պուտինը:

Բայց հիմա, ըստ նրա, այնտեղ հայ չի մնացել, բոլորը գնացել են։

«Այնտեղ պարզապես հայ չկա, գուցե 1000-1500 հայ, վերջ, այնտեղ պարզապես ոչ ոք չկա։ Ինչ վերաբերում է նախկին ղեկավարներին, չգիտեմ, չեմ ցանկանում մանրամասների մեջ մտնել, բայց ինչքան հասկանում եմ՝ նրանց առանձնապես Երևանում էլ չեն ցանկանում տեսնել»,- ասել է Պուտինը՝ նշելով, որ ինքը ելնում է այն բանից, որ այս դեպքում, երբ «տարածքային բնույթի բոլոր հարցերը լուծված են», պետք է ղեկավարվել մարդասիրական նկատառումներից ելնելով։

Պուտինը նաև կրկին հիշեցրել է ՀՀ-ին արված իր առաջարկությունները։

«Մենք մեր հերթին ասում էինք՝ լսեք, Ադրբեջանն աճում է, տնտեսությունը զարգանում է, նավթ ու գազ արտադրող երկիր է, 10 միլիոն բնակչություն ունի, եկեք համեմատենք պոտենցիալները, քանի դեռ նման հնարավորություն կա, մենք պետք է գտնենք այս փոխզիջումը: Մենք մեր հերթին կիրականացնեինք համապատասխան որոշումները Անվտանգության խորհրդում և կերաշխավորեինք բնական ճանապարհով առաջացած Լաչինի միջանցքի անվտանգությունը»,- հայտարարել է Պուտինը՝ հավելելով, թե այդպես բանը հասավ 2020 թվականի զինված բախումներին։