18.12.2025 | 23:09
Գիտությունն ավելի հաճախ պետք է կապվի արդյունաբերության հետ, որպեսզի արդյունավետությունը հնարավոր լինի չափել. Հակոբ Արշակյան
Վաշինգտոնը՝ Արցախի հարցով Ստամբուլում ԱՄՆ-ի, ԵՄ-ի և Ռուսաստանի ներկայացուցիչների հանդիպման մասին
Քաղաքականություն
05.10.2023 | 11:13
Վաշինգտոնը ևս հաստատել է սեպտեմբերի 19-ին Արցախում Ադրբեջանի ռազմական հարձակումից առաջ Ստամբուլում ԱՄՆ-ի, ԵՄ-ի և Ռուսաստանի ներկայացուցիչների հանդիպումը Ստամբուլում։ Այս մասին ճեպազրույցի ժամանակ հայտնել է ԱՄՆ Պետքարտուղարության փոխխոսնակ Վեդանտ Պատելը։
«Ես նախ կքննարկեի այն, որ դա գաղտնի հանդիպում է: Մենք բավականին կանոնավոր կերպով շփվում ենք տարածաշրջանի շահագրգիռ կողմերի հետ, և սեպտեմբերի 17-ին Ստամբուլում հանդիպումը կայացավ՝ անդրադառնալու Լեռնային Ղարաբաղում հատկապես հրատապ հումանիտար խնդիրներին և պոտենցիալ մարդասիրական օգնության տրամադրմանը»,- ասել է Պատելը։
Լրագրողի հստակեցնող հարցին՝ արդյո՞ք դա եղել է Մինսկի խմբի համանախագահների հանդիպում, ամերիկացի պաշտոնյան նշել է, որ դա տեղի է ունեցել աշխատանքային մակարդակով։ Նա նաև խուսափել է պատասխանել հարցին, թե ով է նախաձեռնել հանդիպումը։
Մեկ այլ հարցի, թե դա, ըստ էության, եղել է ԱՄՆ-ի և ՌԴ-ի միջև բարձրաստիճան պաշտոնյաների առաջին հանդիպումը, Պատելը պատասխանել է․ «Ես հենց նոր ասացի. դա աշխատանքային մակարդակով հանդիպում էր, և կրկին՝ դրա կոնկրետ թեման էր Լեռնային Ղարաբաղի տարածաշրջանում հումանիտար կարիքները: Դա էր այս հանդիպման շրջանակն ու ենթատեքստը։ Ես չէի ընդլայնի այն կամ չափից դուրս ավելի չէի մեկնաբանի՝ այլ նշանակություն տալով»։
Իսկ հարցին, թե ինչպե՞ս է վերաբերվում այն բանին, որ հանդիպումից երկու օր անց սկսվեց ռազմական գործողությունները, Պատելն արձագանքել է․ «Սա մի իրավիճակ է, որով մենք շարունակում ենք խորապես մտահոգվել: Ես չեմ ուզում ամփոփվել մեկ կոնկրետ պահի վրա։ Բայց մենք, իհարկե, մտահոգված ենք վերջին ռազմական գործողություններից հետո ստեղծված իրավիճակով, որը հանգեցրել է ավելի քան 100,000 էթնիկ հայերի՝ Լեռնային Ղարաբաղի տարածաշրջանից Հայաստան փախչելուն, և մենք ուշադիր հետևում ենք իրավիճակին տեղում»։
