Քաղաքականություն
04.10.2023 | 15:16
Մոսկվան որոշակի շփումներ է ունեցել Արևմուտքի հետ Լեռնային Ղարաբաղի շուրջ ստեղծված իրավիճակի վերաբերյալ, բայց ոչ այն ամենի, ինչի մասին գրել է Politico-ն։ Այս մասին հայտարարել է ՌԴ նախագահի մամուլի խոսնակ Դմիտրի Պեսկովը, գրում է ՏԱՍՍ-ը։
«Այնպես չէ, ինչպես իրենք են նկարագրում: Այս նյութում կան շատ անճշտություններ, շատ սխալներ: Եղել են որոշակի շփումներ Ղարաբաղի հարցով, դրանք եղել են: Բայց դրանք այն բանակցությունները չեն, որոնց մասին այնտեղ գրված է»,-ասել է Պեսկովը։
Հավելենք, որ Politicօ-ն հայտնել էր, որ ԱՄՆ-ի և ԵՄ-ի բարձրաստիճան պաշտոնյաներն անցյալ ամիս Ադրբեջանի կողմից ռազմական հարձակման մեկնարկից մի քանի օր առաջ Թուրքիայում հանդիպել են իրենց ռուս գործընկերների հետ՝ արտակարգ բանակցությունների համար, որոնք նպատակ են ունեցել լուծել Լեռնային Ղարաբաղի շուրջ հակամարտությունը։
Քննարկումների մասին իրազեկ բարձրաստիճան դիվանագետը լրատվամիջոցին ասել էր, որ հանդիպումը տեղի է ունեցել սեպտեմբերի 17-ին Ստամբուլում՝ Ադրբեջանի վրա ճնշում գործադրելու ջանքերի շրջանակում, որպեսզի վերջ դրվի ԼՂ-ի իննամսյա շրջափակմանը և թույլատրի մարդասիրական օգնության շարասյունները Հայաստանից:
Էմմա Չոբանյան
