05.08.2026 | 18:17
Եկատերինբուրգում մեքենայի պայթյունից ԱԹՍ-ներ մշակող է վիրավորվել
Արցախի դեմ Ադրբեջանի ագրեսիայից առաջ ԵՄ-ն, Ռուսաստանը և ԱՄՆ-ը գաղտնի բանակցություններ են անցկացրել․ POLITICO
Քաղաքականություն
04.10.2023 | 14:15
ԱՄՆ-ի և ԵՄ-ի բարձրաստիճան պաշտոնյաները անցյալ ամիս Ադրբեջանի կողմից ռազմական հարձակման մեկնարկից մի քանի օր առաջ Թուրքիայում հանդիպել են իրենց ռուս գործընկերների հետ՝ արտակարգ բանակցությունների համար, որոնք նպատակ են ունեցել լուծել Լեռնային Ղարաբաղի շուրջ հակամարտությունը, գրում է POLITICO-ն։
Քննարկումների մասին իրազեկ բարձրաստիճան դիվանագետը POLITICO-ին ասել է, որ հանդիպումը տեղի է ունեցել սեպտեմբերի 17-ին Ստամբուլում՝ Ադրբեջանի վրա ճնշում գործադրելու ջանքերի շրջանակում, որպեսզի վերջ դրվի ԼՂ-ի իննամսյա շրջափակմանը և թույլատրի մարդասիրական օգնության շարասյունները Հայաստանից: Ըստ աղբյուրի՝ հանդիպմանը քննարկվել է՝ «ինչպես շարժել բեռնատարները» և ապահովել, որ սննդամթերքի և վառելիքի մատակարարումները կարողանան հասնել 100,000 բնակիչների:
ԱՄՆ-ը ներկայացրել է Կովկասյան բանակցությունների գծով ավագ խորհրդական Լուի Բոնոն, ԵՄ-ն՝ տարածաշրջանում կազմակերպության հատուկ ներկայացուցիչ Տոյվո Կլաարը, իսկ Ռուսաստանը՝ Հայաստանի և Ադրբեջանի հարաբերությունների հարցերով հատուկ բանագնաց Իգոր Խովաևը։
POLITICO-ին տրամադրված հայտարարության մեջ նշվում է, որ «մենք կարծում ենք՝ կարևոր է պահպանել կապի ուղիները համապատասխան զրուցակիցների հետ՝ թյուրիմացություններից խուսափելու համար»: Պաշտոնյան նաև նշել է, որ Կլաարը փորձել է բաց լինել բազմաթիվ ճակատներում «անցած տարիների» ընթացքում, այդ թվում՝ Խովաևի և Ռուսաստանի արտաքին գործերի փոխնախարար Միխայիլ Գալուզինի հետ բանակցություններում:
ԱՄՆ Պետքարտուղարության խոսնակը հրաժարվել է մեկնաբանել հանդիպման մասին հարցը՝ նշելով, որ «չեն մեկնաբանում մասնավոր դիվանագիտական քննարկումները»։
Այնուամենայնիվ, հարցին ծանոթ ամերիկացի պաշտոնյան անանունության պայմանով պարզաբանել է, որ քննարկումները եկել են այն ըմբռնումից, որ Կրեմլը դեռևս իշխում է տարածաշրջանում:
«Մենք պետք է կարողանանք աշխատել ռուսների հետ այս հարցում, քանի որ նրանք ազդեցություն ունեն կողմերի վրա, հատկապես, երբ մենք այժմ գտնվում ենք անկայուն իրավիճակում»,- ասել է ամերիկացի պաշտոնյան:
Էմմա Չոբանյան
