30.05.2026 | 23:02
ՊՍԺ-ն երկրորդ տարին անընդմեջ դարձավ Չեմպիոնների լիգայի հաղթող․ ՏԵՍԱՆՅՈՒԹ
Բաքվի կողմից ուղղորդված ՄԱԿ-ի ի՞նչ առաքելություն է այցելել Արցախ
Քաղաքականություն
03.10.2023 | 14:16
Ադրբեջանում տեղակայված ՄԱԿ-ի գործակալությունների առաքելությունը, Բաքվում ՄԱԿ-ի մշտական համակարգող Վլադանկա Անդրեևայի գլխավորությամբ, կիրակի այցելել էր Լեռնային Ղարաբաղ (Ստեփանակերտ ու Լաչինի միջանցք), որից հետո իրականությանն ու առկա փաստերին հակասող հայտարարություն տարածել։ Միայն այն, որ Ադրբեջանում ՄԱԿ-ի թիմը հայտարարել է, թե քաղաքացիական ենթակառուցվածներին հասցված վնաս չեն տեսել, արդեն իսկ տարօրինակ է՝ հաշվի առնելով այն, որ համացանցում վաղուց են տարածված սեպտեմբերի 19-ի ադրբեջանական ագրեսիայի ժամանակ բնակելի շենքերի հրետակոծության կադրերը։
Ըստ ամենայնի, ՄԱԿ-ի թիմի անդամներին, որոնց թվում նաև ադրբեջանցիներ են եղել, Բաքուն տարել է նախապես առանձնացված վայրեր՝ այդպիսով թաքցնելով սեփական ռազմական հանցագործությունները։ Այդպես ասվում է նաև ՄԱԿ-ի թիմի հայտարարության մեջ, որ «քաղաքի այն հատվածները, ուր այցելել են, ենթակառուցվածներին վնաս չեն տեսել»։
Հայտարարության համաձայն՝ առաքելության կազմում ընդգրկված են եղել ՄԱԿ-ի հումանիտար հարցերի համակարգման գրասենյակի համակարգող բաժնի տնօրեն Ռամեշ Ռաջասինգհեմը, Պարենի և գյուղատնտեսության կազմակերպության, ՄԱԿ-ի փախստականների գործակալության, ՅՈՒՆԻՍԵՖ-ի և Առողջապահության համաշխարհային կազմակերպության ներկայացուցիչներ, ինչպես նաև ՄԱԿ-ի հումանիտար հարցերի համակարգման գրասենյակի, ՄԱԿ-ի մշտական համակարգողի գրասենյակի և ՄԱԿ-ի անվտանգության և անվտանգության վարչության տեխնիկական թիմը:
Հավելենք, որ Բաքվում ՄԱԿ-ի մշտական համակարգող Վլադանկա Անդրեևան բավական սերտ հարաբերություններ ունի Ադրբեջանի իշխանությունների հետ։ Ուշագրավ է նաև, որ Ադրբեջանում ՄԱԿ-ի տեղեկատվական կենտրոնի տնօրեն Ռաշադ Հուսեյնովը, որի անունից էլ հրապարակվել է առաքելության հայտարարությանը, X-ի իր էջում հավանել է Ֆրանսիայում Ադրբեջանի դեսպան Լեյլա Աբդուլաևայի գրառումը՝ հակահայ ենթատեքստով։
Աբդուլաևան հարցազրույց է տվել ֆրանսիական հեռուստաալիքներից մեկին՝ ամեն կերպ փորձելով հերքել ու թաքցնել Արցախում իրականացվող հայերի էթնիկ զտումը։ Նա հայտարարել է, թե հայերը, իբր, ինքնակամ են լքում Լեռնային Ղարաբաղը։ Աբդուլաևան ամեն կերպ փորձել է նաև արդարացնել Ադրբեջանի նախագահ Իլհամ Ալիևի տարածքային նկրտումները Հայաստանի, այդ թվում՝ ՀՀ մայրաքաղաք Երևանի նկատմամբ։ Ադրբեջանում ՄԱԿ-ի աշխատակիցն էլ հավանել է այս հրապարակումը։
Էմմա Չոբանյան
