Բաքուն ներկայացրել է Արցախի հայերի «վերաինտեգրման ծրագիրը»

Ադրբեջանի նախագահի աշխատակազմը հրապարակել է Արցախի հայերի, այսպես կոչված, «վերաինտեգրման ծրագիրը»։ Այն ներառում է գործողություններ 5 ուղղություններով՝ իրավական և վարչական ոլորտ, անվտանգության ոլորտ, տնտեսական ոլորտ, սոցիալական ոլորտ, մշակույթի, կրթության և կրոնի ոլորտ։

Նշվում է, որ իրավական և վարչական ոլորտի շրջանակում «հայ բնակիչների բնակության տարածքներում» կառավարումն իրականացվելու է Ադրբեջանի նախագահի հատուկ ներկայացուցչությունների միջոցով, իսկ բնակիչները «կարող են ներգրավվել հատուկ առաքելությունների աշխատանքում»։

Ադրբեջանի օրենսդրության համաձայն՝ այստեղ ձևավորվելու են մունիցիպալիտետներ։ Բնակիչների քաղաքացիության հարցերը լուծվում են համապատասխան ընթացակարգերի հիման վրա՝ Ադրբեջանի Սահմանադրությանն ու օրենսդրությանը համապատասխան:

Անվտանգության ոլորտում «զինաթափման և զորացրման ավարտից և բնակիչներից ողջ զենքի առգրավումից հետո» Ադրբեջանի ներքին գործերի մարմիններն ապահովում են տարածքում հասարակական կարգի պահպանությունը և բնակիչների անվտանգությունը։ Բնակիչները կարող են ներգրավվել ներքին գործերի մարմիններում աշխատանքում:

Տնտեսական ոլորտում նախատեսված է, մասնավորապես, բնակիչների ապրած տարածքներին ֆիզիկական և սոցիալական ենթակառուցվածքները որոշակի ժամանակահատվածում հասցնել հանրապետական ​​միջինի մակարդակին։ Լինելու են մաքսային և հարկային արտոնություններ։ Բացի այդ, ըստ ծրագրի, ապահովված է Ադրբեջանի ազգային արժույթի ամբողջական ներդրումը շրջանառության մեջ։ Տրամադրվելու են սուբսիդիաներ։

Սոցիալական ոլորտում բնակիչներն ընդգրկված են ամբողջ հանրապետությունում կիրառվող աշխատավարձերի և սոցիալական նպաստների, զբաղվածության ծրագրերով: Բնակիչներն օգտվելու են բջջային ծառայություններից (Mobile ASAN և Mobile DOST):

Մշակույթի, կրթության և կրոնի բնագավառում բնակիչներին երաշխավորվում է իրենց մշակույթն ու էթնոմշակութային առանձնահատկությունները պահպանելու և զարգացնելու իրավունքը։ Ըստ ադրբեջանական կողմի՝ ապահովվելու է նաև կրոնի ազատությունը, մշակութային և կրոնական հուշարձանների պահպանությունը, հայերենի օգտագործման հնարավորությունը։ Իսկ, թե ինչ երաշխիքներով ու մեխանիզմերով է դա իրականացվելու, պարզ չէ։

Էմմա Չոբանյան