«Ցավդ տանեմը» պետք է ոչ թե ասել, այլ անել, փորձենք ազգովի չխելագարվել. Էդգար Բաղդասարյան․ ՏԵՍԱՆՅՈՒԹ

«Ցանկացած խոսք, որը բերում է պառակտման, հիմա պետք է բացառվի: Հիմա մեր ազգի հոգեկան վիճակը ծանր է, կրիտիկական, ուստի ցանկացած վիրավորանք պետք է կտրականապես արգելվի, ես այս առումով նույնիսկ կողմ եմ դաժան ցենզուրային»,- Factor TV-ի հետ զրույցում նշում է կինոռեժիսոր Էդգար Բաղդասարյանը` անդրադառնալով Արցախի կորստին և դրա ֆոնին սոցցանցերում առկա ատելության խոսքին ու տարբաժանումներին:

Եվ չնայած հսկայական կորստին, ռեժիսորը հորդորում է չհուսահատվել, ասում է` Գերմանիան համաշխարհային երկու պատերզմներում պարտվել է, բայց այսօր տնտեսապես ամենազարգացած երկրների ցանկում է. «Չկա ազգ, որը չի պարտվել: Հիմա ուղղակի սուս-փուս օգնել է պետք իրար` առանց ավելորդ պաթոսի ու ամպագոռգոռ խոսքի: Բայց կա մի բան, որը պարտադիր է`մենք պետք է հայկական «Նյուրնբերգյան դատավարություն» անենք, և ամբաստանյալի աթոռին նստեցնենք հայտնի դեմքերի, ընդ որում` 90-ականներից ենք սկսելու` հասկանալու համար` ինչ չի կարելի անել: Բոլորը պետք է ստանան իրենց պատիժը, այլապես կվերանանք քարտեզի վրայից: Անպատժելիությունը ծնեց այսօրվա օրը: Բոլորը երեսուն տարի շարունակ ինչ արեցին` մարսեցին»:

Էդգար Բաղդասարյանը շեշտում է` վերջին երեսուն տարում մենք կեղծ հայրենասիրություն խաղացինք, իմիտացիա արեցինք ու բյուջեն թալանեցինք: Նա խոսում է նաև այն արվեստագետների մասին, որոնք այս ծանր օրերին լուռ են. «Ես չեմ կարող ընդունել այն արվեստագետին, որն այս օրհասական պահին կես բերան չի խոսում, իրեն այս ժողովրդի մաս չի համարում: Մենք հիմա պարտավոր ենք իրար օգնել ու կարեկցել: «Ցավդ տանեմը» պետք է ոչ թե ասել, այլ անել: Փորձենք ազգովի չխելագարվել ու վերապրել այս ցավը»:

Մանրամասները` տեսանյութում:

Աննա Բաբաջանյան