15.01.2026 | 23:35
Ավարտվել է ՀՀ շախմատի առաջնությունների 3-րդ խաղափուլը․ Զավեն Անդրիասյանը միանձնյա առաջատար է
Կարևոր է, որ Հաագայի դատարանի որոշումը կատարվի՝ ապահովվի Լաչինի միջանցքով անարգել տեղաշարժը․ Մեծ Բրիտանիայի դեսպանը՝ ԵԱՀԿ նիստում
Քաղաքականություն
13.09.2023 | 14:45
Հայաստանի նախաձեռնությամբ նախօրեին հրավիրված ԵԱՀԿ հատուկ մշտական խորհրդի նիստում Արցախում տիրող իրավիճակի վերաբերյալ իր դիրքորոշումն է հայտնել կազմակերպությունում Մեծ Բրիտանիայի դեսպան Նիլ Հոլանդը՝ մտահոգություն հայտնելով հումանիտար ճգնաժամի կապակցությամբ։
«Միացյալ Թագավորությունը խորապես մտահոգված է Լաչինի միջանցքի շարունակական խափանումներով և տեղի բնակչության համար դրա հետ կապված մարդասիրական հետևանքներով, մասնավորապես, կապված դեղորայքի, առողջապահական խնամքի և այլ հիմնական ապրանքների ու ծառայությունների մատակարարման հետ: Հետևաբար, կարևոր է, որ 2023 թվականի փետրվարին ընդունված Արդարադատության միջազգային դատարանի որոշումը կատարվի՝ Լաչինի միջանցքի երկայնքով երկու ուղղություններով անարգել տեղաշարժ ապահովելու համար»,- ասել է Հոլանդը։
Նա նշել է, որ Բրիտանիան կողմերին խստորեն հորդորում է թույլ տալ ԿԽՄԿ-ին մուտք գործել հասանելի բոլոր երթուղիներով, ինչպիսին է նաև Աղդամի ճանապարհը, որպեսզի կազմակերպությունը կարողանա կատարել կենսական նշանակության իր աշխատանքը: Բացի այդ, բոլոր կողմերը պետք է ձեռնպահ մնան մարդասիրական օգնության հետագա քաղաքականացումից՝ խաղաղ բնակչության կարիքները բավարարելու համար։
«Բրիտանիան մտահոգությամբ նշում է լարվածության աճը՝ վերջին շրջանում երկու կողմերի սահմանային խախտումների և ռազմական մանևրների աճից հետո: Մենք վստահ ենք, որ այս հակամարտությունը ռազմական լուծում չունի, և երկու կողմերին կոչ ենք անում կրկնապատկել իրենց ջանքերը՝ միջազգային միջնորդությամբ բանակցություններում առաջընթաց գրանցելու համար, այդ թվում՝ դրույթներ ընդունելով Լեռնային Ղարաբաղի բնակիչների իրավունքների և անվտանգության պաշտպանության համար»,- ասել է բրիտանավի դիվանագետը։
Հոլանդը նշել է նաև, որ «միայն դիվանագիտական ճանապարհով և ՄԱԿ-ի կանոնադրությամբ ու Հելսինկյան եզրափակիչ ակտով ամրագրված ինքնիշխանության և տարածքային ամբողջականության սկզբունքներին համապատասխան կտեսնեն հակամարտության կայուն լուծումը և Հայաստանի ու Ադրբեջանի միջև պատմական խաղաղության համաձայնագիրը»։
Էմմա Չոբանյան
