«Միակ ճանապարհը երկխոսությունն է և ապագայի քննարկումն Ադրբեջանի կազմում»․ Բայրամովը՝ Արցախի մասին

Ադրբեջանի ԱԳ նախարար Ջեյհուն Բայրամովն ադրբեջանական պետական ​​«Ազերթաջ»-ին և հունգարական Magyar Demokrata հրատարակությանը տված հարցազրույցում կրկին ադրբեջանական կեղծ քարոզչական թեզերն է հնչեցրել, նաև հայտարարել, թե Արցախի հայերի «վերաինտեգրման գործընթացն այլընտրանք չունի»։

«Ադրբեջանի նախագահի կողմից նշանակված հատուկ ներկայացուցիչը տարեսկզբին առաջին հանդիպումն անցկացրեց Ղարաբաղում, որից հետո, որպես յուրատեսակ «ռոտացիա», հաջորդեց Ադրբեջանի քաղաքներից մեկում երկրորդ հանդիպման հրավեր։ Հայ բնակչության ներկայացուցիչների ուշադրությանն է արժանացել նաև այն, որ կենտրոնական իշխանության ներկայացուցիչը պատրաստ կլինի շարունակել հետագա հանդիպումները նույն ռոտացիոն ձևաչափով՝ երրորդ հանդիպումը կրկին Ղարաբաղում, և այդպես շարունակ»,- ասել է Բայրամովը։

Նա հավելել է, որ Բաքվի համար կարևոր է երկխոսությունը, սակայն չի նշել, թե ինչո՞ւ է Ադրբեջանը հրաժարվել օգոստոսի 1-ին Բրատիսլավայում ծրագրված հանդիպումից։

«Մեզ համար կարևոր էր, որ գործընթացը շարունակվի։ Եվ այս առումով Բաքուն դրսևորեց բարի կամք բաց երկխոսության համար։ Սա է առաջ գնալու միակ ճանապարհը։ Նրանք, ովքեր հրաժարվում են երկխոսությունից, պետք է իրենց ազատեն երրորդ ուժերի ձեռքում պատանդի դերից, որոնք կարող են նրանց ուղերձներ ուղարկել և խոստանալ ցանկացած բան։ Նրանք պետք է նայեն անցյալին և մտածեն, թե ինչի են հասել։ Միակ ճանապարհը երկխոսությունն է և ապագայի քննարկումն Ադրբեջանի կազմում։ Ուրիշ ճանապարհ պարզապես չկա, քանի որ մնացած ամեն ինչ անօրինական է։ Սա մեր կարմիր գիծն է. Ադրբեջանի տարածքում այլևս գորշ գոտիներ չեն լինի»,- նշել է նա։

Խոսելով Լաչինի միջանցքի փակման մասին՝ Բայրամովը կրկին հերքել է այդ փաստը։

«Ամեն օր տասնյակ հայեր հանգիստ անցնում են անցակետով երկու ուղղություններով։ Նրանք տեղափոխում են հիվանդներին, բացի այդ, ԿԽՄԿ-ն տարածաշրջան է բերում դեղեր և այլ անհրաժեշտ պարագաներ»,- ասել է ադրբեջանցի նախարարը։

Հիշեցնենք՝ հենց Կարմիր Խաչն է հայտարարել, որ սահմանափակվել է իր գործունեությունը Լաչինի միջանցքով և միայն քիչ թվով հիվանդների է հնարավոր լինում տեղափոխել, մարդասիրական բեռների փոխադրում ընդհանրապես չի կատարվում։

«Սևացման այդ ամբողջ արշավը հումանիտար աղետի մասին որևէ հիմք չունի։ Անհնար է մի երկրի (Ադրբեջան), որը մեկի փոխարեն մատակարարման մի քանի ուղիներ է առաջարկում, մեղադրել մարդասիրական ճգնաժամ ստեղծելու մեջ»,-հայտարարել է Ադրբեջանի ԱԳ նախարարը։

Էմմա Չոբանյան