Աննա Հակոբյանն այսօր Կիևում կմասնակցի Առաջին տիկնանց և ամուսինների ամենամյա գագաթնաժողովին

Վարչապետ Նիկոլ Փաշինյանի կինը՝ Աննա Հակոբյանը, սեպտեմբերի 6-ին Կիևում մասնակցում է առաջին տիկնանց և ամուսինների ամենամյա գագաթաժողովին, որն անցկացվում է Ուկրաինայի առաջին տիկին Օլենա Զելենսկու նախաձեռնությամբ․ տեղեկացնում են վարչապետի տիկնոջ գրասենյակից։

Առաջին տիկնանց և ամուսինների գագաթնաժողովը աշխարհի առաջին դեմքերի ամուսինների միջազգային ասոցիացիան է, որը հիմնադրվել է Ուկրաինայի նախագահի կնոջ՝ Օլենա Զելենսկայի կողմից 2021 թվականին՝ փորձի փոխանակման և աշխարհում մարդկանց բարօրության համար համատեղ ծրագրեր իրականացնելու նպատակով։ Այս մասին տեղեկանում ենք գագաթնաժողովի պաշտոնական կայքէջում հրապարակված խոսնակների ցուցակից։ Առաջին և երկրորդ գագաթնաժողովները կայացել են համապատասխանաբար 2021 և 2022 թվականներին։

Այս ձևաչափի երրորդ գագաթաժողովի թեման հոգեկան առողջությունն է։

Ըստ միջոցառման կայքի՝ Աննա Հակոբյանը մասնակցելու է դեռահասների հոգեկան առողջության թեմայով պանելային քննարկման։ Մյուս մասնակիցներն են՝ Էստոնիայի առաջին տիկինը, Սլովակիայի նախագահի զուգընկերը, հոլիվուդյան դերասան Ռիչարդ Գիրը (հեռավար) և այլք։

«Քննարկելու ենք այսօր դեռահասների առաջ կանգնած թվային մարտահրավերները։ Ի՞նչ սպառնալիքներ ու հնարավորություններ է բերում աշխարհի թվայնացումը։ Ինչպե՞ս կարող է ավագ սերունդը աջակցել պատանիներին աշխարհին հարմարվելու գործում՝ առանց նրանց սահմանափակելու»,- նշված է պանելային քննարկման նկարագրությունում։

2023-ի գագաթաժողովին մասնակցում են Դանիայի, Իսրայելի, Մեծ Բրիտանիայի, Ճապոնիայի, Թուրքիայի, Իսպանիայի և այլ երկրների առաջնորդների կանայք և ամուսիններ, բարձրաստիճան պաշտոնյաներ, դերասաններ և այլք։

Երեկ հայտնել էինք, որ Հայաստանն օգնություն է ուղարկել Ուկրաինա։