«Անընդունելի է «Լաչինի մարդասիրական միջանցք» արտահայտության օգտագործումը»․ Բաքուն դժգոհել է Մակրոնից

Պաշտոնական Բաքուն հերթական անգամ դժգոհել է Արցախի վերաբերյալ Ֆրանսիայի նախագահ Էմանունել Մակրոնի հայտարարություններից։

«Այն փաստը, որ Ֆրանսիայի նախագահը հերթական անգամ արտահայտել է իր տեսակետը՝ հիմնվելով տարածաշրջանում հումանիտար իրավիճակի մասին պնդումների վրա, ևս մեկ անգամ ապացուցում է Փարիզի քաղաքականության սխալականությունը»,-հայտարարել է  Ադրբեջանի ԱԳՆ խոսնակ Այխան Հաջիզադեն։

Նա նշել է, որ Մակրոնի հայտարարությունները, իբրև, թե վնասում են խաղաղության օրակարգին։ Հաջիզադեն  անընդունելի է համարել, որ Մակրոնն իր ելույթում օգտագործել է այնպիսի արտահայտություններ, ինչպիսիք են «Լաչինի մարդասիրական միջանցքը», «խոսել ճնշման լեզվով», ինչը, ըստ Բաքվի՝ «անհարգալից է Ադրբեջանի տարածքային ամբողջականության և ինքնիշխանության նկատմամբ»։

«Ադրբեջանը վճռական է տարածաշրջանում խաղաղություն և անվտանգություն ապահովելու հարցում»,- ասել է Բաքվի ԱԳՆ խոսնակը՝ հավելելով, որ «դրսից միջամտելու ցանկացած փորձ վճռականորեն ճնշվելու է»։

Հավելենք, որ Ֆրանսիայի նախագահ Էմանունել Մակրոնը  ֆրանսիական դեսպանների հետ համաժողովի իր ելույթում անդրադարձել էր նաև Արցախում տիրող հումանիտար ճգնաժամին ու Լաչինի միջանցքի արգելափակմանը։

«Ոչինչ չի կարող արդարացնել այն հումանիտար իրավիճակը, որն այսօր ապրում է Լեռնային Ղարաբաղի ժողովուրդը»,-ասել էր  Մակրոնը։ Ֆրանսիայի նախագահը նաև հայտնել էր, որ  այս շաբաթ պատրաստվում է զրուցել Հայաստանի ու Ադրբեջանի ղեկավարների հետ։

«Մենք կպահանջենք լիակատար հարգանք Լաչինի մարդասիրական միջանցքի նկատմամբ և միջազգային մակարդակով կրկին դիվանագիտական ​​նախաձեռնություն կձեռնարկենք այս ուղղությամբ՝ ճնշումը մեծացնելու համար»,-ընդգծել էր Էմանունել Մակրոնը։

Էմմա Չոբանյան