Մեզ հնարավոր է հաղթել միայն ներսից քայքայելով․ ապաքաղաքական զրույց Ռուբեն Ասատրյանի հետ․ ՏԵՍԱՆՅՈՒԹ

Factor TV-ի A-politic հաղորդաշարի հյուրն է դիրիժոր, արվեստի վաստակավոր գործիչ Ռուբեն Ասատրյանը: Նրա կարծիքով՝ անգամ պատերազմական վիճակում արժե խոսել արվեստի մասին, քանի որ դա ազգային ինքնության կարևոր բացադրիչն է: Դարերի ընթացքում Հայաստանը հնարավոր չէր եղել հրով և սրով ոչնչացնել, իրական վտանգ կարող է լինել միայն մեր մշակույթը ներսից քայքայելը: Որպես պատերազմի ժամանակ ստեղծված գլուխգործոցներից մեկը՝ դիրիժորը բերում է Արամ Խաչատրյանի Երկրորդ սիմֆոնիայի օրինակը, որտեղ, նրա կարծիքով, մարմնավորվել է մեր հազարամյա պատմությունը:

Հաղորդման հյուրը հատուկ անդրադարձել է Ավետ Տերտերյանի ստեղծագործությանը՝ կարծիք հայտնելով, որ կոմպոզիտորն ամենևին էլ չէր ձգտում «նորարարության», պարզապես գրի էր առնում այն, ինչ լսում էր: Ընդ որում, ըստ Ռուբեն Ասատրյանի, Տերտերյանը կարող էր ստեղծագործել միայն Հայաստանում, որովհետև հենց մեր երկիրն էր նրա համար կապ ստեղծում տիեզերքի հետ: Դիրիժորը վստահ է, որ հայ կոմպոզիտորի երաժտությունն ավելի խորը կերպով է ընկալվելու ունկնդիրների հաջորդ սերունդների կողմից:

Արդյո՞ք արդարացված է երաժիշտների շրջանում մրցույթներ անցկացնելը և ի՞նչ են այդ մրցույթները բացահայտում: Հաղորդման հյուրը վերապահումներով է վերաբերվում մրցույթների գաղափարին՝ կարծիք հայտնելով, որ դրանք ավելորդ հուզմունք են առաջացնում երիտասարդ կատարողների մոտ, և դա այն սթրեսը չէ, որը նպաստում է ստեղծագործական խնդիրների լուծմանը: Նույն վերապահումները դիրիժորն ունի կոչումների և շքանշանների հանդեպ: Վատ չէ, երբ մարդկանց վաստակը գնահատվում է, բայց դա, ըստ երաժշտի, չափազանց երկրորդական խնդիր է:

Մանրամասները՝ տեսանյութում:

Արամ Աբրահամյան