02.11.2024 | 17:34
ՀՀ առողջապահության և էկոնոմիկայի նախարարները քննարկել են Հայաստանում առողջապահական զբոսաշրջության զարգացման միտումները
Ռուսաստանի և Չինաստանի դիրքորոշումներն Ուկրաինայի հարցում ավելի ու ավելի են տարբերվում․ ISW
Քաղաքականություն
09.08.2023 | 17:25
Ռուսաստանի արտգործնախարար Սերգեյ Լավրովի և Չինաստանի ԱԳ նախարար Վան Իի բանակցությունների արդյունքները վկայում են այն մասին, որ Պեկինի տեսակետն ավելի ու ավելի է հեռանում Մոսկվայի դիրքորոշումից այն հարցում, թե ինչպես դադարեցնել պատերազմն Ուկրաինայում։ Այս մասին ասվում է Պատերազմի ուսումնասիրության ինստիտուտի (ISW) փորձագետների հերթական զեկույցում։
Երկու նախարարների հեռախոսազրույցը տեղի է ունեցել երկուշաբթի՝ Սաուդյան Արաբիայում Ուկրաինայի հարցով գագաթնաժողովից անմիջապես հետո, որին Ռուսաստանը հրավիրված չէր, իսկ Չինաստանի ներկայացուցչի ժամանումը, հակառակը, ողջունվեց և բեկումնային որակվեց։ Ռուսաստանի և Չինաստանի ԱԳ նախարարությունների հաղորդագրություններում Լավրովի և Վան Իի զրույցը տարբեր կերպ է ներկայացվել, նշում է ISW-ն։
Ռուսական գերատեսչությունը հայտնել է, որ նախարարները «քննարկել են երկկողմ և միջազգային օրակարգը, ինչպես նաև մի շարք տարածաշրջանային թեմաներ, այդ թվում՝ ուկրաինական ճգնաժամը»: Չինաստանի ԱԳ նախարարությունն էլ հայտնել է, որ կողմերը «կարծիքներ են փոխանակել» պատերազմի վերաբերյալ։
«Վան Ին ընդգծել է, որ Չինաստանը կպահպանի անկախ և անկողմնակալ դիրքորոշումն ուկրաինական հարցում, կշարունակի արտահայտել օբյեկտիվ և ռացիոնալ կարծիք, ակտիվորեն խթանել խաղաղ բանակցությունները և քաղաքական լուծում փնտրել ցանկացած միջազգային իրադարձության հետ կապված»,- ասվում է Չինաստանի ԱԳՆ հայտարարության մեջ։
Բանակցությունների արդյունքների նկարագրության նման անհամապատասխանությունը կարող է վկայել այն մասին, որ Կրեմլը դժգոհ է Չինաստանի ջանքերից՝ իր խաղաղության ծրագիրը միջազգային հարթակներում առաջ մղելու հարցում։ Դա համահունչ է ISW-ի նախկին գնահատականներին, ըստ որոնց՝ Չինաստանը շահագրգռված չէ Ռուսաստանի հետ «անսահման գործընկերությամբ», ինչպես ցանկանում է Մոսկվան, նշում են փորձագետները։
