Հայցվոր պաշտոնյաները փորձում են հաշիվ մաքրել լրագրողների և ԶԼՄ-ների հետ, ճնշել նրանց. Աշոտ Մելիքյան․ ՏԵՍԱՆՅՈՒԹ

Հայաստանում այս տարվա երկրորդ եռամսյակում լրագրողների և լրատվամիջոցների դեմ 16 հայց է ներկայացվել, որից 11–ը իշխող քաղաքական ուժի կամ պաշտոնյաների կողմից, 5–ը` գործարար շրջանակներից։ Այս տեղեկությունը հրավիրված ասուլիսում հայտնեց Խոսքի ազատության պաշտպանության կոմիտեի նախագահ Աշոտ Մելիքյանը՝ այսօր հրավիրված ասուլիսում ամփոփելով 2023թ–ի երկրորդ եռամսյակում լրագրողների և լրատվամիջոցների դեմ առկա խնդիրները։

Մելիքյանի խոսքով՝  այդ ցուցանիշն առաջին կիսամյակի համեմատ կրկնակի աճել է։

Մելիքյանի դիտարկմամբ՝ որպես կանոն անտեսվում են արտադատական լուծումները, որոնցից են` դիմել խմբագրություն, հերքում պահանջել կամ պատասխանի իրավունքից օգտվել, ԶԼՄ–ների էթիկայի կարգավորման դիտորդ մարմնին դիմել և այլն։
«Դա այն մտքին է հանգեցնում, որ այդ հայցվորները հիմնականում փորձում են հաշիվ մաքրել լրագրողների կամ լրատվամիջոցների հետ, ճնշել նրանց։ Ամենացցուն օրինակը, թերևս, Տիգրան Ավինյանի հայցն է ընդդեմ «168 ժամի» և լրագրող Դավիթ Սարգսյանի»,- նշեց Մելիքյանը։

ԽԱՊԿ նախագահի խոսքով`տվյալ դեպքում հայցվորն օրենքով նախատեսված դրամական փոխհատուցման ամենաբարձր շեմից է օգտվել։ Ավինյանը պահանջել է 9 մլն դրամ փոխհատուցում, ավելին` նա նաև միջնորդություն է ներկայացրել դատարան, որպեսզի այդ հայցագրի չափով կալանք կիրառվի պատասխանողների գույքի և բանկային հաշիվների վրա։

«Միջազգային նորմերն ու մեր օրենսդրությունն ասում են, որ արգելանք կարելի է դնել այն դեպքում, երբ կա համոզմունք, որ չդնելու պարագայում հնարավոր չէ կատարել դատական ակտը, մինչդեռ այստեղ որևէ վտագ նկատելի չէր։ Դա է պատճառը, որ մենք համարում ենք, որ դատական գործերն ընդդեմ լրագրողների և լրատվամիջոցների` ունեն ճնշելու, հաշիվ մաքրելու միտում, և դա մտահոգիչ է»,-ընդգծեց Մելիքյանը։

Մանրամասները՝ տեսանյութում։