07.10.2026 | 23:48
Արթուր Դանիելյանը կալանավորվեց
Խոցված Boeing. Իրանի դեմ հայց է ներկայացվել Արդարադատության միջազգային դատարան
Քաղաքականություն
05.07.2023 | 19:39
Մեծ Բրիտանիան, Ուկրաինան, Շվեդիան և Կանադան համատեղ դիմում են ներկայացրել Արդարադատության միջազգային դատարան՝ Իրանի դեմ գործ հարուցելու համար։ Այս մասին ասվում է դատարանի տարածած մամուլի հաղորդագրության մեջ։
Դիմումը ներկայացվել է հունվարի 8-ին Թեհրանի մոտակայքում ուկրաինական ինքնաթիռի կործանման կապակցությամբ, փոխանցում է DW-ի ռուսական ծառայությունը։
Ինքնաթիռում եղել է 167 ուղևոր և անձնակազմի 9 անդամ, ոչ ոքի չի հաջողվել փրկվել։ Մահացածների ցուցակում եղել են Իրանի 82, Կանադայի 63, Ուկրաինայի 11 և Շվեդիայի 10 քաղաքացիներ, ինչպես նաև մի քանի ուղևորներ այլ պետություններից (այդ թվում՝ Գերմանիայի 3 քաղաքացի):
Դիմումի մեջ նշվում է, որ Իրանը «չի կարողացել իրականացնել լիարժեք, թափանցիկ և անաչառ նախաքննություն և դատավարություն՝ միջազգային չափանիշներին համապատասխան», ինչպես նաև «չի ձեռնարկել բոլոր գործնական քայլերը՝ կանխելու Մոնրեալի կոնվենցիայի 1-ին հոդվածում նկարագրված անօրինական և դիտավորյալ հանցագործության կատարումը»:
2022 թվականի հունվարի 6-ին Կանադայի, Մեծ Բրիտանիայի, Շվեդիայի և Ուկրաինայի կառավարությունների ներկայացուցիչները հայտարարություն են տարածել, որում ասվում էր, որ իրենք հրաժարվում են Իրանին 2020 թվականին խոցված ուկրաինական Boeing-ի համար փոխհատուցման վճարման շուրջ Իրանի հետ բանակցություններում ներգրավելու փորձերից և կփորձեն լուծել այս հարցը միջազգային իրավունքին համապատասխան։
Տաթև Ֆռանգյան
