Reuters-ի արձագանքը Թուրքիային․ լրատվամիջոցը պաշտպանում է Էրդողանի որդու դեմ կոռուպցիոն գործի մասին հրապարակումը

Լոնդոնում գործող Reuters լրատվական գործակալությունը, որը Թուրքիայի կառավարության կոշտ քննադատությանն է արժանացել նախագահ Ռեջեփ Թայիփ Էրդողանի որդու հետ կապված միջազգային հետաքննության մասին հրապարակման պատճառով, հայտարարել է, որ այն համապատասխանում է լրագրողական սկզբունքներին, գրում է VOA-ի թուրքական ծառայությունը, որին վկայակոչում է Turkish Minute-ը։

Հիշեցնենք՝ Reuters-ը «ԱՄՆ-ի և Շվեդիայի դատախազները հետաքննում են Էրդողանի որդու դեմ կոռուպցիայի վերաբերյալ բողոքը» վերնագրով հրապարակում էր արել։ Դրանում ասվում է, որ Միացյալ Նահանգների և Շվեդիայի հակակոռուպցիոն իշխանությունները վերանայում են բողոքը, որում ասվում է, որ ամերիկյան ընկերության շվեդական մասնաճյուղը խոստացել է տասնյակ միլիոնավոր դոլարների «ատկատներ» վճարել, եթե Թուրքիայի նախագահ Ռեջեփ Թայիփ Էրդողանի որդին օգնի նրան ապահովել գերիշխող դիրք երկրի շուկայում։

Թուրքիայի կառավարության պաշտոնյաների զայրացած արձագանքից հետո, որոնք Reuters-ին մեղադրում են ապատեղեկատվություն և կեղծ լուրեր տարածելու մեջ, VOA-ն հետաքրքրվել է թեմայի վերաբերյալ Reuters-ի տեսակետով: Գրավոր մեկնաբանությունում Reuters-ը նշել է, որ իր հրապարակումն արվել է Thomson Reuters-ի վստահության սկզբունքներին, գլոբալ հանրային շահերին և արդար ու ճշգրիտ հաշվետվություններին նվիրվածությանը համապատասխան:

Thomson Reuters-ի վստահության սկզբունքները, որոնք մշակվել են 1941 թվականին, պարտավորություններ են սահմանել Reuters-ի և նրա աշխատակիցների համար՝ մշտապես գործելու ազնվությամբ, անկախությամբ և կողմնակալությունից զերծ:

Հավելենք, որ նյութի հրապարակումից հետո Ստամբուլի Անատոլիական 5-րդ խաղաղության քրեական դատարանն արգելափակել էր մուտքը 93 կայքեր ու թվիթերյան օգտահաշիվներ «անձնական իրավունքների ոտնահարման» հիմքով՝ Reuters-ի նյութը հրապարակելու համար։ Բացի այդ, Թուրքիայի կառավարամետ լրատվամիջոցները հայտնել էին, որ խզել են պայմանագրերը լրատվական գործակալության հետ։

Նախագահ Էրդողանի հասարակայնության հետ կապերի տնօրեն Ֆահրեթթին Ալթունը Reuters-ի հրապարակումը որակել էր որպես «ապատեղեկատվության արդյունք»՝ ասելով, որ լրագրության պատմության առումով այն «սև բիծ է»։

Փոխնախագահ Ջևդեթ Յըլմազն էլ ասել էր, որ դատապարտում է Reuters-ին Բիլալ Էրդողանի դեմ «մանիպուլյատիվ և կեղծ լուրեր» հաղորդելու համար։

Էմմա Չոբանյան