ԱՄՆ-ի և Շվեդիայի դատախազները հետաքննում են Էրդողանի որդու դեմ կոռուպցիայի բողոքը

ԱՄՆ-ի և Շվեդիայի հակակոռուպցիոն իշխանությունները հետաքննում են բողոքը, ըստ որի՝ ամերիկյան ընկերության շվեդական դուստր ձեռնարկությունը խոստացել է տասնյակ միլիոնավոր դոլարների «ատկատներ» վճարել, եթե Թուրքիայի նախագահ Ռեջեփ Թայիփ Էրդողանի որդին օգնի գերիշխող դիրք զբաղեցնել երկրում: Այս մասին ասվում է Reuters-ի հատուկ անդրադարձում, որը վկայակոչում է Turkish Minute-ը։

Ըստ Reuters-ի փաստաթղթերի՝ Dignita ընկերության ծրագիրն է եղել՝ ստանալ Թուրքիայի կառավարության հավանությունը՝ օգտագործելու իրենց սարքավորումները, որոնք անջատում են մեքենան, եթե վարորդը հարբած է: 10-ամյա բացառիկ գործարքի դիմաց Dignita-ն համաձայնել է վճարել տասնյակ միլիոնավոր դոլարների լոբբիստական ​​վճար երկու կազմակերպությունների, որտեղ Թուրքիայի նախագահի որդի Բիլալ Էրդողանը խորհրդի անդամ է: Սակայն, ի վերջո, գումարը չի վճարվել և անցած տարեվերջին Dignita-ն փակել է նախագիծը:

ԱՄՆ Արդարադատության դեպարտամենտը և Շվեդիայի դատախազները բողոքը ստացել են ապրիլին և նախնական հետաքննություն են սկսել՝ պարզելու՝ արդյո՞ք խախտվել են ԱՄՆ-ի և Շվեդիայի հակակաշառակերության օրենքները։ ԱՄՆ Օտարերկրյա կոռուպցիոն պրակտիկայի մասին օրենքը (FCPA) կարող է խախտում հաստատել նույնիսկ առանց գումարի փոխանակման: Երկու երկրներն էլ որոշակի հանգամանքներում վճարման խոստումը պոտենցիալ հանցավոր են համարում: Նախաքննությունը կարող է հանգեցնել կամ չհանգեցնել պաշտոնական հետաքննության կամ մեղադրական եզրակացության:

Dignita-ի ամերիկյան մայր ընկերությունը՝ 1A Smart Start LLC-ն, հաստատել է նախագծի դադարեցումը՝ նշելով, որ իմացել են Թուրքիայում «պոտենցիալ վտանգավոր վարքագծի» մասին, որը հանգեցրել է մի քանի մարդկանց աշխատանքից ազատվելուն:

Այս գործընթացը տեղի է ունենում Թուրքիայի և Շվեդիայի հարաբերությունների համար զգայուն ժամանակաշրջանում, երբ Անկարան արգելափակում է ՆԱՏՕ-ին Ստոկհոլմի անդամակցությունը։ Այս հետաքննությունը կարող է է՛լ ավելի լարել երկու երկրների հարաբերությունները։

Էմմա Չոբանյան