ԵՐԵՎԱՆԻ ԺԱՄԱՆԱԿՈՎ. Վախկոտների ու կեղծավորների մի ոհմակ ցանկացած իշխանության ժամանակ քծնանքով առաջ է գնացել. Արտավազդ Բայաթյան. ՏԵՍԱՆՅՈՒԹ

«Մեծահարուստները պետք է հիշեն, որ եթե մի երկրում աղքատությունը շատ է, հարուստը պետք է դադարի հարուստ լինել: Այդ ցուցադրական շքեղությունը արհամարհանք է՝ մարդկանց նկատմամբ, կարծես ասում են՝ դուք լինեք-չլինեք՝ մեզ համար միևնույն է: Ես համոզված եմ, որ Սաշիկ Սարգսյանի տան վերելակը նոր չի կառուցվել, բայց բոլորը խիզախացան, երբ այնտեղ գործողություն իրականացվեց, այնինչ պետք էր ըմբոստանալ ավելի վաղ»,- Factor.am-ի հետ զրույցում նման տեսակետ է հայտնում երգիչ-երգահան Արտավազդ Բայաթյանը՝ անդրադառնալով ԱԱԾ-ի կողմից Սերժ Սարգսյանի եղբոր՝ Սաշիկ Սարգսյանի տանը իրականացրած խուզարկությանը:

Նրա խոսքով՝ քաղաքացին այս փուլում չպետք է լսի՝ ում մասին են շատ խոսում և միանա մյուսներին, այլ պետք է անկախ ամեն ինչից՝ իր դիրքորոշումն ունենա, որը կարտահայտվի իր գործողություններում, արվեստի մարդը՝ առավել ևս. «Այսօր «հեղինակավոր» մարդը կարող է լկտիաբար գովաբանել հանցավոր խմբի կամ իրեն չեզոք պահել: Վախկոտների ու կեղծավորների մի ոհմակ ցանկացած իշխանության ժամանակ քծնանքով առաջ է գնացել: Անընդհատ կարելի է տեսնել այդ մարդկանց լղոզված ժպիտները: Ամեն դեպքում, մարդիկ զատում են անկեղծությունը կեղծիքից»:

Երգահանն անդրադառնում է նաև հեղափոխության ընթացքում ծնված երգերին՝ նկատելով, որ ժողովուրդն իներցիայով շարունակում է հեղափոխությունը վերածել «քեֆի». «Այս ընթացքում ծնված մի շարք երգեր ոչ մարդու սրտին են դիպչում, ոչ մտքին: Գուցե մեկ-երկու երգ իրենց նպատակին ծառայել են, բայց այնպիսի մի գործ, որը մարդկանց մոտ կարթնացներ արդարության զգացողություն, ես չեմ լսել: Իմաստ չունի ժողովրդին տաշիտուշիներ հրամցնել»:

Մանրամասները՝ տեսանյութում:

Աննա Բաբաջանյան