ԳՇ պետը զանգել, առաջարկել է երկու գեներալի տալ հերոսի կոչում․ Փաշինյան․ ՏԵՍԱՆՅՈՒԹ

ԳՇ պետը զանգել, առաջարկել է երկու գեներալի տալ հերոսի կոչում․ 44-օրյա պատերազմի հանգամանքներն ուսումնասիրող հանձնաժողովի նիստում այս մասին հայտնեց վարչապետ Նիկոլ Փաշինյանը։

Նշենք, որ ազգային հերոսի կոչում են ստացել ՀՀ Զինված ուժերի նախկին գլխավոր շտաբի պետի առաջին տեղակալ, գեներալ-լեյտենանտ Տիրան Խաչատրյանը և 5-րդ բանակային կորպուսի նախկին հրամանատար գեներալ-մայոր Անդրանիկ Փիլոյանը։

Գլխավոր շտաբի պետը զեկուցել է այդ շրջանում իրադրության վերաբերյալ, ասվել է, որ իրավիճակն ամուր պահվում է, բնագիծ է ստեղծվել նահանջից հետո, և այնտեղ կանգ են առել։ ԳՇ պետն ասել է՝ երկու գեներալների տանք հերոսի կոչում՝ դա պետք է և՛ բանակի մարտական ոգու, և՛ մնացածի համար։ Ես, հասկանալով լրջությունը, ասել եմ՝ մտածեմ, ասեմ։

Ես մտածել եմ, որ տաք կաբինետում նստած խնդիրներ եմ առաջադրում զինվորականներին, մարդիկ առավելագույնն են անում այդ խնդիրը լուծելու համար, ինձնից ուզում են մի թուղթ ստորագրեմ, հերոսի կոչում տամ, կտամ։ Դա հոկտեմբերի կեսերին էր,- նշեց Փաշինյանը՝ ընդգծելով, որ ինքն առաջնորդվել է մտածելով՝ ես էլ ինչ անեմ, որպեսզի մեր բանակն զգա, որ ՀՀ քաղաքական իշխանությունը կանգնած է իր թիկունքին։

44-օրյա պատերազմի հանգամանքներն ուսումնասիրող ԱԺ քննիչ հանձնաժողովի նախագահ Անդրանիկ Քոչարյանը նշեց, որ արցախյան վերջին պատերազմի ժամանակ դասալիքների կամ մարտը լքածների մասով տարբեր թվեր են շրջանառվում, և հետաքրքրվեց՝ ի՞նչ է զեկուցվել  վարչապետին այդ մասին:

Փաշինյանը հարցին պատասխանեց պաշտոնական տեղեկատվությամբ՝ առանց լրացուցիչ մեկնաբանության․ «44-օրյա պատերազմի և հայտարարված ռազմական դրության ժամանակահատվածում զինվորական ծառայության կարգի դեմ ուղղված, ինչպես նաև այլ հանցագործությունների դեպքերով նախաձեռնված բազմաթիվ քրեական վարույթներ վերաբերում են ընդհանուր առմամբ 12 600 անձի:

Քրեական գործերն առնչվում են քաղաքացիների, զինծառայողների կողմից զորահավաքային զորակոչից խուսափելու, հրաման չկատարելու, դասալքության, զորամասը ինքնակամ թողնելու, անդամահատման եղանակով զինվորական ծառայության կամ դրա առանձին պարտականությունների կատարումը դադարեցնելու, զինծառայության պարտականությունները կատարելուց հրաժարվելու և այլ դեպքերի»։

«Թե այս թվից քանի՞ մարդ մեղավոր կճանաչվի, որքա՞նն անմեղ կճանաչվի, ո՞ւմ նկատմամբ քրեական հետապնդումը կդադարեցվի, ո՞ւմ նկատմամբ գործը կգնա դատարան՝ այդ հարցին ես չեմ կարող պատասխանել»,- նշեց Փաշինյանը։

Մանրամասները՝ տեսանյութում։