Քաղաքականություն
27.06.2023 | 13:032018 թվականից ԱԱԾ-ն ու ԱԱԾ հետախուզությունն անընդհատ ահազանգել են պատերազմի հնարավորության մասին։ 44-օրյա պատերազմի հանգամանքներն ուսումնասիրող քննիչ հանձնաժողովի այսօրվա նիստում այս մասին հայտարարեց վարչապետ Նիկոլ Փաշինյանը։
«Այո՛, ժամկետներ էլ են նշվել՝ 2018-ի ամռանը, աշնանը, հոկտեմբերին, սեպտեմբերին, 2019-ի գարնանը, ամռանը։ Այդ տեղեկատվությունը միշտ եղել է, այդ տեղեկատվությունը բաց աղբյուրներում էլ է եղել, այդ տեղեկատվությունը վերլուծաբաններն էլ են դրել»,- նշեց վարչապետը՝ անդրադառնալով հանձնաժողովի նախագահ Անդրանիկ Քոչարյանի դիտարկմանը․ որ ԳՇ նախկին պետ Օնիկ Գասպարյանը հայտարարել է, թե 2020 թվականի սեպտեմբերի 25-ին ռադիոկլանման միջոցով «F-16» կործանիչների օդաչուների խոսակցությունն է եղել, որ «կիրակի ինչ-որ կարևոր բանի պիտի մասնակցեն»։ Քոչարյանը հետաքրքրվեց՝ Գասպարյանը զեկուցե՞լ է այս մասին վարչապետին։
Նիկոլ Փաշինյանն էլ ասաց, որ, այո՛, այդ տեղեկատվությունը զեկուցվել է իրեն։
«Մեր ինստիտուտները մինչև ամսի 25-ը 30 տոկոսով են հավանական գնահատել պատերազմը։ Այդ գնահատումը եղել է ոչ միայն հետախուզության, այլև միջազգային գործընկերների հետ շփումներից։ Ինձ ուրիշ բան էլ է զեկուցվել, որ պատերազմի հավանականությունը 30 տոկոս է ու հավանականություն է հնչել, որ սա հոգեբանական ճնշում է քաղաքական իշխանության վրա, որ գնան անհամաչափ զիջումների։ Այս թեմայի հետ կապված դռնփակ հատվածում ես լրացուցիչ տեղեկություններ կտրամադրեմ, այդ տեղեկությունները տրամադրել եմ նաև Քննչական կոմիտեին»,- մանրամասնեց վարչապետը։
Փաշինյանի խոսքով՝ իրեն զեկուցվել է, որ միջազգային գործընկերներն էլ պատերազմը քիչ հավանական են համարում ու կոչ են անում, որ ՀՀ ԶՈՒ-ն կտրուկ գործողություններ չիրականացնի՝ «չեղած տեղից պատերազմ չսադրելու համար»։
«Ես՝ անձամբ այդ գնահատականի հետ այդքան էլ համաձայն չէի, իմ հրահանգը միշտ եղել է այն, որ պետք է ապահովել բարձր զգոնություն»,- ասաց նա։
Վարչապետը հավելեց, որ 2020 թվականի հուլիսին ՊՆ-ում խորհրդակցություն է արել, հարցրել է՝ ունե՞նք այնպիսի ինդիկատորներ, որոնց ի հայտ գալու դեպքում գնահատվում է՝ վերջ, հարձակում է տեղի ունենալու։
«Ինձ ասել են, որ, այո՛, կան նման ինդիկատորներ։ Իմ հրահանգը եղել է միանշանակ, որ անկախ ամեն ինչից, ես հիմա բաց հրահանգ եմ տալիս, որ եթե այդ ինդիկատորները ի հայտ կգան, բանակը պետք է սահմանված ձևով գործի, ինչը հիմա տեսնում ենք, որ, ցավոք սրտի, տեղի չի ունեցել»,- նշեց վարչապետը։
Մանրամասները՝ տեսանյութում։
