22.03.2026 | 21:42
Վահագն Խաչատուրյանն առանձնազրույց է ունեցել Վրաստանի նախագահի հետ
Դեղ ներմուծող ընկերություններին դնում ենք անհարմար վիճակի մեջ. տուգանքի չափն անհամաչափ է բարձրանում․ ՏԵՍԱՆՅՈՒԹ
Տնտեսություն
14.06.2023 | 11:03
Երեկ՝ քննարկումից անմիջապես հետո ահազանգեր են հնչել դեղեր և բժշկական պարագաներ ներմուծող կազմակերպությունների կողմից առ այն, որ անհամաչափ բարձրացվում է տուգանքի չափը։ Ազգային ժողովի նիստում այս մասին նշեց «Հայաստան» խմբակցության պատգամավոր Արծվիկ Մինասյանն անդրադառնալով «Վարչական իրավախախտումների վերաբերյալ ՀՀ օրենսգրքում լրացումներ և փոփոխություններ կատարելու մասին» և «Նյութական պահուստների մասին» օրենքներում առաջարկվող փոփոխություններին։
«Այն դեպքում, երբ կառավարության մեկ այլ որոշմամբ ընդլայնվել է այս ցանկը՝ 50-ից դառնալով 180 ապրանք, որոնց էական մասը գրանցված չլինելու պատճառով չեն կարողանում ներմուծում ապահովել։ Եվ ստացվում է, որ եթե այս օրենքն այս տեսքով ընդունվի, այս կազմակերպությունները հայտնվելու են հսկայական տուգանքների տակ»,- նշեց Մինասյանը։
Պատգամավորի դիտարկմամբ՝ այս մոդելի ներդրման պարագայում հատկապես ռազմավարական պաշարների մասով խնդիր է առաջանալու՝ հետագայում այդ դեղերը փոխարինելու այլ համարժեք դեղերով, որը ենթադրում է բյուրոկրատական հսկայական քաշքշուկ, ինչն այս կազմակերպություններին ակամայից դնում է ծանր իրավիճակում։
Մինասյանն առաջարկեց այս նախագծի վերաբերյալ 24-ժամյա ռեժիմը հանել կամ հիմա երկրորդ ընթերցմամբ ու ամբողջությամբ չընդունել, հանձնաժողովում քննարկումներ կազմակերպելու հնարավորություն տալ, որին կմասնակցեն նաև ոլորտի ընկերությունները։
Մանրամասները՝ տեսանյութում։
