ԿԲ նախագահը՝ ՀՀ բանկերի կողմից ռուսական ընկերությունների վճարումները արգելափակելու մասին․ ՏԵՍԱՆՅՈՒԹ

ՀՀ ԿԲ-ն բանկերին չի ուղղորդում որևէ գործողության։ Այս մասին այսօր լրագրողների հետ հանդիպմանը նշեց ԿԲ նախագահ Մարտին Գալստյանը՝ անդրադառնալով հարցին, թե արդյո՞ք ճիշտ է ՀՀ բանկերի կողմից ռուսական ընկերությունների վճարումները արգելափակելու մասին տեղեկատվությունը։

«Մենք միայն հորդորում է աշխատել միջազգային լավագույն փորձի շրջանակներում։ Այսինքն՝ ճանաչեն իրենց հաճախորդին, ճիշտ կարողանան գնահատել ռիսկի ախորժակը և բնականաբար, ճիշտ կարողանան իրականացնել այն գործառնությունները, որոնք բնորոշ են բանկային համակարգին»,- նշեց ԿԲ նախագահը։

Գալստյանը հիշեցրեց, որ նախորդ տարի «հակառակ խոսակցությունները» կային՝ հայկական բանկերը հիպերակտիվ են հաճախորդներ ներգրավելու հարցում, արդյոք դա չի՞ հանգեցնելու պատժամիջոցների տակ հայտնվելու էական ռիսկերի։ Այդ ժամանակ ևս, ըստ ԿԲ նախագահի, բանկերին հորդորել են ճիշտ կառավարել իրենց ռիսկերը։

«Հիմա գործողություններ, որոնք ուղղված են ռիսկերի կառավարմանը, կարող են հանգեցնել նաև որոշակի կոնտրագենտների (պայմանագիր կնքողների) հետ հարաբերությունների խզման, հարաբերությունները կարող են հանգեցնել նրան, որ որոշակի փոխանցումներ չարվեն։ Դա կարող է պայմանավորված լինել ոչ միայն բանկերի ինքնուրույն որոշմամբ, այլ՝ նաև այն թղթակից բանկերի որոշմամբ, որոնց հետ իրենք աշխատում են։ Օրինակ՝ փոխանցումը գնում է արտասահմանյան բանկի միջոցով, և արտասահմանյան բանկի կողմից կա պահանջ, որը պիտի հայկական բանկը կատարի։

Որոշակի գործընկերային հարաբերություններ հաճախորդների հետ կարող են խզվել, փոխվել, մեծանալ կամ փոքրանալ՝ կախված իրադարձությունների զարգացումից։ Կարող են դեպքեր լինել, որ դա կապված լինի պատժամիջոցների հետ։ Կարող են դեպքեր լինել, որ կապված չլինի պատժամիջոցների հետ, ուղղակի կոնտրագենտը չկարողանա ներկայացնել փաստաթղթերի այն ամբողջական շրջանակը, որը պետք է բանկին լիակատար համագործակցության տեսանկյունից»,- նշեց ԿԲ նախագահը։

Մանրամասները՝ տեսանյութում։