06.06.2026 | 17:50
Ընտրական հանցագործությունների գործերով ձերբակալվել է 194, քրեական հետապնդման ենթարկվել՝ 209 անձ. ՀԿԿ
Ընթանում է Խաչատրյանի անվան մրցույթի 1-ին փուլը. մասնակիցները ներկայանում են մենահամերգով
Մշակույթ
08.06.2023 | 14:59
Կոմիտասի թանգարան-ինստիտուտում ընթանում է Խաչատրյանի անվան 19-րդ միջազգային մրցույթի 1-ին փուլը։ Այս փուլում յուրաքանչյուր մասնակից ներկայանում է մենահամերգով՝ առավելագույնը 45 րոպե տևողությամբ․ տեղեկացնում են «Արամ Խաչատրյան» մշակութային հիմնադրամից։
Այակա Մասեդան Հայաստանի է ժամանել Ճապոնիայից։ Խաչատրյանական մրցույթին մասնակցում է երկրորդ անգամ։ Առաջին մրցելույթների ժամանակ եզրափակչին չէր հասել, այս տարի ավելի լավ արդյունքի ակնկալիք ունի։ Նա նշում է, որ թեև Հայաստանն ու Ճապոնիան շատ հեռու են միմյանցից, սակայն իր հայրենիքում շատ լավ գիտեն ու սիրում են Արամ Խաչատրյանի երաժշտությունը։ Առաջին անգամ 13 տարեկանում է լսել Խաչատրյանի մեղեդիները և դրանից հետո, երիտասարդ դաշնակահարի խոսքով, սիրահարված է հայ կոմպոզիտորի արվեստին։ «Ինձ գերում է Խաչատրյանի երաժշտության էներգետիկան, որը ես չեմ հանդիպել այլ դասական կոմպոզիտորների մոտ»,- խոստովանում է Այակա Մասեդան։
Հարավային Կորեան ներկայացնող դաշնակահարուհի Իսադորա Ջիին Կիմն էլ նշում է, որ իր հայրենակիցների համար Խաչատրյանի երաժշտությունը շատ հոգեհարազատ է։ Նա հատկապես ընդգծում է այն փաստը, որ Խաչատրյանն իր արվեստում մեծ տեղ է տվել ազգային երաժշտությանը և դա արել է շատ գեղեցիկ ու ներդաշնակ։ Իսադորա Ջիին Կիմը Խաչատրյանի Դաշնամուրի կոնցերտը սովորել է նրա անունը կրող մրցույթին մասնակցելու համար։
Այսօր երեկոյան հայտնի կդառնան առաջին փուլը հաղթահարած երաժիշտների անունները։ Վաղը կմեկնարկի Խաչատրյանի անվան 19-րդ միջազգային մրցույթի երկրորդ փուլը։
Հիշեցնենք, որ խաչատրյանական մրցույթն անցկացվում է «Արամ Խաչատրյան» մշակութային հիմնադրամի կազմակերպմամբ և ՀՀ ԿԳՄՍ նախարարության աջակցությամբ։ Մրցույթը 2013 թվականից Ժնևում հիմնված Միջազգային երաժշտական մրցույթների համաշխարհային ֆեդերացիայի (WFIMC) անդամ է և գործում է ֆեդերացիայի սահմանած կանոններով։
