12.09.2026 | 10:04
ՀՀ տարածքում ավտոճանապարհներն անցանելի են
Չկա դպրոց, մանկապարտեզ, խմելու ջուր․ Բաքվից 30 կմ հեռավորությամբ ապրողները բողոքում են սարսափելի կենսապայմաններից
Քաղաքականություն
02.06.2023 | 22:40
Ադրբեջանի Գարադաղի շրջանի Շոնգար բնակավայրի բնակիչներն օրերս բողոքի ցույց էին կազմակերպել, որին մասնակցել է մոտ 80-ից 100 մարդ, և ուշադրություն հրավիրել իրենց սարսափելի կենսապայմանների վրա։ Չնայած բնակավայրը գտնվում է Բաքվից ընդամենը 30 կմ հեռավորության վրա՝ այն չունի տարրական հարմարություններ, ինչպիսիք են միջնակարգ դպրոցը, մանկապարտեզը, բժշկական հաստատությունը և հանգստի գոտին: Ասֆալտապատ ճանապարհների և կոյուղու բացակայությունն ավելի է սրում խնդիրները՝ բնակիչները խմելու ջուր են ստանում երեք օրը մեկ անգամ։ Բացի այդ, հարևան քարհանքերն ավելորդ քանակությամբ փոշի են առաջացնում, ինչը բացասաբար է անդրադառնում գյուղացիների առողջության վրա:
Այս ամենը ևս հակադրվում է նախագահ Իլհամ Ալիևի քարոզաչական թեզերին ու հայտարարություններին, թե Ադրբեջանը մեծ տեմպերով զարգանում է և մարդիկ սոցիալապես ապահով են ապրում։
Շոնգար բնակիչները իրենց բողոքներն են պատմել տեղական լրատվամիջոցներին։ Գյուղի ակտիվիստ Սալեհ Գուլմամեդովն իր հիասթափությունն ու դժգոհությունն է ներկայացրել իշխանության ներկայացուցիչներին, այդ թվում՝ նախագահական վարչակազմի պաշտոնյաներին և փոխվարչապետին։ Չնայած օգնության մասին խոստումներին՝ դեռևս որևէ քայլ չի ձեռնարկվել։
Շոնգարի երեխաները ստիպված են ամեն օր մեկնել մոտակա Գյզըլդաշ գյուղ՝ դպրոց հաճախելու համար՝ վտանգի ենթարկելով իրենց կյանքը բանուկ մայրուղին անցնելիս: Մանկապարտեզի բացակայությունը խանգարում է նաև կանանց աշխատանք փնտրելուն, քանի որ նրանք իրենց նախադպրոցական երեխաներին պետք է խնամեն։ Գյուղում բուժհաստատության բացակայության պատճառով էլ շտապ բուժօգնության խնդիրն է սուր։ Գյուղացիները ստանձնել են դպրոցի կառուցումը, որը նախատեսված է 300 աշակերտի համար։
Բժշկական հաստատության բացակայությունը նշանակում է, որ բնակիչները ստիպված են երկար ճանապարհ անցնել՝ բուժծառայություններից օգտվելու համար:
Բողոքի ակցիայի մասնակիցներից Վասիֆ Հասանովը և Ահադ Ահադովն էլ գրավոր բողոքներ են ներկայացրել իշխանություններին, այդ թվում՝ նախարարների կաբինետին, սակայն քայլեր չեն ձեռնարկվել խնդիրների լուծման համար։
Նշվում է, որ չնայած ավագ դպրոցի շենքը կառուցվել է բրիտանական BP ընկերության կողմից 2019 թվականին, դասերը կարճ ժամանակ անց դադարեցվել են շինարարական թերությունների պատճառով․ շենքը ներկայում գտնվում է վթարային վիճակում, իշխանություններն էլ չեն շտապում լուծել բնակավայրի այս և մյուս խնդիրները։
Էմմա Չոբանյան
