30.04.2026 | 10:10
Դրամն արժևորվել է․ արտարժույթների փոխարժեքները՝ ապրիլի 30-ի դրությամբ
Էրդողանը խոսել է Թրամփի հետ ընկերությունից ու խոստացել Պուտինի հետ քննարկել Սլովակիա գազի մատակարարման հարցը
Քաղաքականություն
21.01.2025 | 23:56
Անկարայում նախագահական համալիրում նախօրեին Սլովակիայի վարչապետ Ռոբերտ Ֆիցոյի հետ կայացած մամուլի ասուլիսում Թուրքիայի նախագահ Ռեջեփ Թայիփ Էրդողանն անդրադարձել է ԱՄՆ նորընտիր նախագահ Դոնալդ Թրամփի հետ հարաբերություններին։
Թուրքական լրատվամիջոցների փոխանցմամբ՝ հարցին, որ Թրամփը իր վերջին հայտարարություններում բազմիցս հիշատակել է Թուրքիայի նախագահի հետ իր մտերմությունը, Էրդողանն արձագանքել է․
«Մեզ համար շատ կարևոր է պահպանել այն ընկերությունը, որն ունեինք առաջին ժամկետում»։
Էրդողանը, հիշեցնելով, որ Թրամփի հետ խոսել է ընտրություններում հաղթանակի հաջորդ օրը, ասել է, որ այդ ընթացքում նախնական զրույցներ են ունեցել։ Նա նաև խոսել է Ռուսաստանի և Ուկրաինայի միջև պատերազմին վերջ տալու Թրամփի խոստումներից։
«Թուրքիան աշխարհում պատերազմների կողմնակից չէ։ Մենք խաղաղության կողմնակից ենք։ Մենք պետք է հնարավորինս շուտ կարգավորենք այս խնդիրը: Այս հարցերը մենք կքննարկենք պարոն Թրամփի հետ մեր հանդիպումներում և համապատասխան քայլեր կձեռնարկենք։ Ես ցանկանում եմ, որ պարոն Թրամփի երկրորդ ժամկետը բարենպաստ լինի ողջ մարդկության համար»,- հայտարարել է Էրդողանը։
Նա նաև մեկնաբանել է Եվրոպա ռուսական բնական գազի մատակարարումների հարցը, նշելով, որ Սլովակիան հայտնվել է ծանր վիճակում այն բանից հետո, երբ Ուկրաինան դադարեցրել է Սլովակիային գազամատակարարումը։
Էրդողանը հայտնել է, որ այդ հարցը կքննարկի Թուրքիայի էներգետիկայի և բնական պաշարների և արտգործնախարարության, ինչպես նաև Ռուսաստանի ԱԳ նախարար Սերգեյ Լավրովի և անձամբ նախագահ Վլադիմիր Պուտինի հետ։
Հավելենք նաև, որ Էրդողանն ու Ֆիցոն ստորագրել են Թուրքիայի Հանրապետության և Սլովակիայի միջև ռազմավարական գործընկերության հաստատման մասին համատեղ հռչակագիր։ Բացի այդ ՝ կողմերի միջև համագործակցության ևս երեք փաստաթուղթ է ստորագրվել։
Թարգմանությունը՝ Էմմա Չոբանյանի
