«Որքան հարուստները հարստանում են, այնքան մնացած խավերի վիճակը բարելավվում է». ապաքաղաքական զրույց Ռուստամ Բադասյանի հետ. ՏԵՍԱՆՅՈՒԹ

Factor TV-ի A-politic հաղորդաշարի հյուրն է Հայաստանի Պետական եկամուտների կոմիտեի նախագահ Ռուստամ Բադասյանը:

Նրա կարծիքով՝ հարկեր վճարելը պետական մշակույթի կարևորագույն մասն է և չի կարող պայմանավորվել «արևելյան» կամ «արևմտյան» աշխարհընկալմամբ: ՊԵԿ նախագահը ուշադրություն է դարձնում այն հանգամանքի վրա, որ Եվրամիության երկրները նույնպես բավականին տարբեր են իրենց մշակույթով, սակայն դա չի խանգարում այդ պետություններին հետևել որոշակի ստանդարտներին:

Ռուստամ Բադասյանը կողմ է, որ այս պատմական ժամանակահատվածում եկամտային հարկը բնակչության տարբեր խմբերի համար լինի համահարթ՝ վերջին տարիներին դա իրեն արդարացրել է և օգնել է ստվերից հանել շոշափելի թվով տնտեսվարողների: Արտահայտելով իր անձնական մոտեցումը՝ հաղորդման հյուրը տեսակետ է հայտնում, որ պետք է հնարավորություն տալ հարուստներին հարստանալ։ Հասկանալով, որ այդ տեսակետը միանշանակ չի ընդունվի, ՊԵԿ նախագահը, այնուամենայնիվ, պնդում է, որ նման մոտեցումը նպաստավոր է նաև քաղաքացիների մնացած խավերի համար:

Անդրադառնալով անկանխիկ գործարքների խնդրին՝ Ռուստամ Բադասյանն ընդունում է, որ ՀԴՄ սարքեր, որոնք POS տերմինալներ ունեն, կան առևտրի ոչ բոլոր կետերում, իսկ եթե կան էլ, ապա միշտ չէ, որ սպառողներին հնարավորություն է տրվում դրանցից օգտվել: Անկանխիկ գործարքների հետ կապված կա նաև կանխիկացնելու տոկոսի խնդիրը, ինչպես նաև որոշ քաղաքացիների մտահոգությունը՝ իրենց անձնական տվյալների անվտանգության վերաբերյալ:

Մանրամասները տեսանյութում:

Արամ Աբրահամյան