18.12.2025 | 01:35
Տհաճ միջադեպ՝ Արման Ծառուկյանի մենամարտի ժամանակ. ՏԵՍԱՆՅՈՒԹ
Չինաստանի հատուկ ներկայացուցիչը կայցելի Ուկրաինա, Լեհաստան, Ֆրանսիա, Գերմանիա և Ռուսաստան
Քաղաքականություն
12.05.2023 | 15:39
Չինաստանի Եվրասիայի հարցերով հատուկ ներկայացուցիչ Լի Հուեյը մայիսի 15-ից կայցելի Ուկրաինա, Լեհաստան, Ֆրանսիա, Գերմանիա և Ռուսաստան՝ «խաղաղության բանակցություններին նպաստելու համար»։ Այս մասին հայտնել է Չինաստանի ԱԳՆ-ն, գրում է BBC-ի ռուսական ծառայությունը։
Պեկինը խոստացել էր ուղարկել իր ներկայացուցչին «բոլոր կողմերի հետ ուկրաինական ճգնաժամի քաղաքական կարգավորման վերաբերյալ խորը հաղորդակցության համար»՝ ապրիլի վերջին Չինաստանի առաջնորդ Սի Ցզինպինի և Ուկրաինայի նախագահ Վլադիմիր Զելենսկիի հեռախոսազրույցից հետո։ Դա երկու առաջնորդների առաջին խոսակցությունն էր Ուկրաինայի դեմ Ռուսաստանի պատերազմի մեկնարկից ի վեր։
Մարտին էլ Մոսկվայում Սի Ցզինպինը հանդիպել էր ՌԴ նախագահ Վլադիմիր Պուտինին։
Դեռևս փետրվարից Չինաստանն առաջ է տանում իր 12 կետանոց խաղաղության ծրագիրը Ուկրաինայի համար, որոնց թվում են կրակի դադարեցումը, բանակցությունների սկսումը, միակողմանի պատժամիջոցների վերացումը։ Ե՛վ Եվրամիությունը, և՛ Միացյալ Նահանգները, և՛ Կիևը հայտարարել են, որ Չինաստանի նախաձեռնությանը վերաբերվում են որպես դիրքորոշման, բայց ոչ որպես կարգավորման իրական պլանի կամ կողմերի միջև բանակցությունների առաջարկի։
Արևմտյան երկրները գտնում են, որ Չինաստանի խաղաղության նախաձեռնությունները Կիևի համար պատերազմից դուրս գալու որոշակի ճանապարհ չեն պարունակում, նաև կարող են օգտագործվել Պուտինի կողմից զինադադարի հաստատման համար, որի արդյունքում ռուսական զորքերը կպահպանեն ուկրաինական օկուպացված տարածքների նկատմամբ վերահսկողությունը։
Էմմա Չոբանյան
