20.02.2026 | 12:38
Թրամփը մեկ տարով երկարաձգել է Ռուսաստանի դեմ պատժամիջոցները
Հարավային Կորեայի նախագահը երկրորդ փորձից ձերբակալվել է
Քաղաքականություն
15.01.2025 | 11:55
Հարավային Կորեան երկրորդ փորձից ձերբակալել է նախագահ Յուն Սոկ Յոլին, որն անցյալ տարվա դեկտեմբերին խորհրդարանի կողմից իմփիչմենթի ենթարկվեց՝ ռազմական դրություն մտցնելու փորձի համար: Ինքը՝ նախագահը, հայտարարել է, որ ինքնակամ է համաձայնել ներկայանալ հարցաքննության, փոխանցում է BBC-ի ռուսական ծառայությունը։
Սա Հարավային Կորեայի պատմության մեջ գործող նախագահի առաջին ձերբակալությունն է: Նախագահական նստավայրում մի քանի ժամ տևած ընդհարումից հետո, ինչպես 12 օր առաջ առաջին անգամ, քննիչները կարողացել են Յունին այս անգամ բերել կոռուպցիայի գործով հետաքննության բյուրո՝ հարցաքննության:
Յունն ավելի վաղ հրապարակել է կարճ տեսաուղերձ, որում ասել է, թե դեռևս կարծում է, որ ձերբակալությունն անօրինական է, սակայն որոշել է ենթարկվել քննիչներին և ոստիկանությանը՝ արյունահեղությունից խուսափելու համար:
«Թեև այս գործն անօրինական է, բայց ես որոշեցի ներկայանալ Կոռուպցիայի հետաքննության բյուրո՝ անհարկի արյունահեղությունը կանխելու համար։ Բայց դա չի նշանակում, որ ես համաձայն եմ, որ նրանք բացեն գործը»,- ասել է նախագահը։
Նա հավելել է, որ երկրում խախտվում է օրենքի գերակայությունը, և որ դրա իրավունքը չունեն ո՛չ իր դեմ գործ հարուցած քննչական մարմինները, ո՛չ էլ կալանավորման օրդեր տված դատարանը։
Դեկտեմբերի սկզբին Հարավային Կորեայի նախագահը ծայրահեղ միջոցների կիրառմամբ փորձել էր շարունակել պայքարն ընդդեմ ընդդիմության, որը վերահսկողություն էր հաստատել խորհրդարանում. նա անհաջող փորձ էր արել երկրում ռազմական դրություն մտցնել։ Դրանից հետո խորհրդարանը նրան մեղադրել է ապստամբության փորձի մեջ և դեկտեմբերի 14-ին իմփիչմենթի ենթարկել պետության ղեկավարին։
Թարգմանությունը՝ Տաթև Ֆռանգյանի
