Քաղաքականություն
25.04.2023 | 23:57
Լաչինի միջանցքում տեղի ունեցած վերջին զարգացումների վերաբերյալ հայտարարությամբ է հանդես եկել Կանադայի արտաքին գործերի նախարար Մելանի Ժոլին։
«Կանադան խորապես մտահոգված է Լեռնային Ղարաբաղի և հարակից տարածաշրջանի միջև միակ ցամաքային կապի՝ Լաչինի միջանցքում Ադրբեջանի կողմից հսկիչ-անցագրային կետի տեղադրմամբ։
Այս գործողությունն ակնհայտորեն խաթարում է խաղաղության գործընթացը և կայունությունը ողջ տարածաշրջանում։
Մենք կոչ ենք անում Ադրբեջանի իշխանություններին վերաբացել Լաչինի միջանցքը։ Այն պետք է մնա բաց և անարգել՝ թույլ տալու մարդկանց և ապրանքների ազատ տեղաշարժը:
Կանադան երկու կողմերին կոչ է անում վերսկսել բանակցությունները և զերծ մնալ սահմանի երկայնքով հետագա էսկալացիայից կամ թշնամական գործողություններից»,- ասված է հաղորդագրության մեջ:
Հիշեցնենք՝ ադրբեջանական կողմը ապրիլի 23-ին փակել է Արցախ-Հայաստան սահմանագծին գտնվող Հակարի գետի կամուրջը։
ՀՀ ԱԳՆ-ն խստորեն դատապարտել է Ադրբեջանի՝ Լաչինի միջանցքում ապօրինի անցակետ տեղադրելու քայլը:
ԱՀ ԱԳՆ-ն հայտարարություն է տարածել՝ պահանջելով ՄԱԿ-ի ԱԽ անդամ պետություններից իրականացնել իրենց ստանձնած պարտավորությունները և վերջ դնել Արցախի էթնիկ զտման և նրա ժողովրդին ոչնչացնելու Ադրբեջանի հանցավոր քաղաքականությանը։
Արցախի անվտանգության խորհուրդը ստեղծված իրավիճակի վերաբերյալ հայտարարություն է ընդունել:
Ֆրանսիան դատապարտել է Ադրբեջանի կողմից Լաչինի միջանցքի նոր ճանապարհի սկզբնամասում անցակետի տեղադրումը:
ԱՄՆ պետքարտուղարությունը հայտարարություն է տարածել Ադրբեջանի կողմից Լաչինի միջանցքում ապօրինի անցակետ տեղադրելու վերաբերյալ։
ՌԴ ԱԳՆ-ն անդրադարձել է Ադրբեջանի կողմից Լաչինի միջանցքում ապօրինի անցակետի տեղադրմանը, ինչպես միշտ՝ անհասցե և Բաքվի գործողությունները չդատապարտող հայտարարությամբ։
Բաքուն արձագանքել է Լաչինում անցակետի տեղադրման վերաբերյալ Ֆրանսիայի ԱԳՆ-ի հայտարարությանը։
