19.02.2026 | 20:47
Մարկ Ցուկերբերգը դատարանում ցուցմունք է տվել սոցցանցերից երեխաների կախվածության գործով
Բաքուն արձագանքել է Լաչինում անցակետի տեղադրման վերաբերյալ Ֆրանսիայի ԱԳՆ-ի հայտարարությանը
Քաղաքականություն
24.04.2023 | 16:25
Բաքուն արձագանքել է Լաչինի միջանցքում ապօրինի անցակետի տեղադրման հետ կապված Ֆրանսիայի ԱԳՆ հայտարարությանը։
Ադրբեջանի ԱԳՆ խոսնակ Այխան Հաջիզադեն հայտարարել է, որ Ֆրանսիայի հայտարարությունն «անհիմն է»։
«Ադրբեջանի ինքնիշխան և օրինական իրավունքն է՝ սահմանային անցակետ ստեղծել իր «ինքնիշխան տարածքում»։ Չկա որևէ հիմք՝ պնդելու, որ այդ քայլը հակասում է եռակողմ հայտարարությանը կամ այլ միջազգային փաստաթղթի ու դատարանի որոշման»,- հայտարարել է Հաջիզադեն։
Հիշեցնենք՝ Ֆրանսիան Ադրբեջանին կոչ էր արել վերականգնել բեռների, մարդկանց և ապրանքների ազատ տեղաշարժը Լաչինի միջանցքով։
«Ֆրանսիան ափսոսում է Ադրբեջանի կողմից Լաչինի միջանցքի նոր երթուղու մուտքի մոտ անցակետ տեղադրելու կապակցությամբ, որը խախտում է հրադադարի համաձայնագրերով ստանձնած պարտավորությունները և խաթարում բանակցային գործընթացը։ Ֆրանսիան Ադրբեջանին կոչ է անում կատարել իր միջազգային պարտավորությունները, մասնավորապես՝ կիրառել Միջազգային դատարանի փետրվարի 22-ի որոշման մեջ նշված միջանկյալ միջոցները, որոնք պարտադիր են։ Ֆրանսիան նաև կոչ է անում վերականգնել բեռների, մարդկանց և ապրանքների ազատ տեղաշարժը Լաչինի միջանցքով երկու ուղղություններով և վերականգնել բնակչությանը գազի ու էլեկտրաէներգիայի շարունակական մատակարարումը»,- ասված է Ֆրանսիայի ԱԳՆ հայտարարությունում։
Հավելենք, որ ԱՄՆ Պետքարտուղարությանը ևս մտահոգություն էր հայտնել՝ նշելով, որ Ադրբեջանի կողմից Լաչինի միջանցքում անցակետի ստեղծումը խաթարում է խաղաղ գործընթացի նկատմամբ վստահության հաստատմանն ուղղված ջանքերը:
Ուշագրավ է, որ պաշտոնական Բաքուն ձեռնպահ է մնացել Վաշինգտոնին արձագանքելուց։
Էմմա Չոբանյան
